En Medyanos de Sukkot apenas entri al “Şalom”, alkansi dizir “Hag Sameah”, las muchachikas de la resepsyon me dyeron un “emanet” vinido kon posta. Kuryoza de ver el timbro de Austria, tomi el paketiko, un poko enkantada asta ke vide el nombre del ekspeditor: Aron Saltiel i su muevo CD... Otomatikamente dishe “Bravo! Adam gibi adam!” (benadadm).
Djusto antes un anyo, myentres el proseso de preparasyon de este CD, muestra amiga Klara Perahya i yo lavorimos un poko tyempo kon Aron Saltiel. El teniya chikas difikultades, ezitasyones sovre la sinyifikasyon de syertas dichas, lokusyones o byervos ke estava enkontrando en las ansyanas kantikas de Boda. En la mezura de muestro “entender” logrimos a ayudarle. El disho ke el CD iva salir en serka i mo lo iva mandar. Kreyo ke el lektor ya entenderiya ke es por esto ke lo yami benadam. Reelmente me aviya olvidado kompletamente este evento del anyo pasado.
Este CD es el fruto de un lavoro bastante largo, minusyozo i de grande kualidad. No es un simple CD komo los ke enkontramos muy frekuente. Esta komo un “manadero de referensya” del punto de vista muzikal i tradisyon. En todo kavzo es lo ke me izo pensar. Las 22 Kantikas de Boda de varios sentros komo Salonik, Yerushalayim, Estambol, Izmir, Bulgariya ets.. eskritas en judeo-espanyol i kon sus traduksyon en inglez, turko i aleman. Ay tambyen dos introduksyones en estas linguas, una de Dr. Judith Cohen i otra de Yusuf Altıntaş. Las kantikas kantadas por el “Ensemble Saltiel” en un stilo otantik, akompanyado por instrumentos oriental komo ud, kanun, kemenche, zurna, klarinet ets... i enrejistradas aki.
Ken es Aron Saltiel? Es un muzisyen investigador de Muzika Sefaradi, nasido en Estambol i bivyendo aktualmente en Austria. Kon su ija Rivka, sus dos ermanas i sovrino formaron el “Ensemble Saltiel” para darmos kon sus muzika el rekuerdo nostaljiko i el gozo del pasado.
Bueno... Devo dizir ke para mi, Aron es un poko mas ke esto. Yo lo konosi muy chiko, tambyen i sus ermanas, porke mos konosiyamos bueno kon su famiya, espesyalmente kon su madre Beki Bicerano Saltiel (de b.m) ermana del regretado Salamon Bicerano. Viniyan muy frekuente vijitar sus tiyos, la famiya Barokas, vizinos i amigos muestros en el Saffet Bey Apt. Esto todo lo avlimos kon Aron Saltiel ke se akodro tambien de akeyos anyos. Kon las dos famiyas orijinaryas de Chorlu, syempre tuvimos relasyones karinyozas. Ma, kon los Bicerano, sin ser de primer grado, en el korso de los anyos tuvimos diversos atajidos de “mishpaha”.
Basta kon los rekuerdos! tornaremos al C.D. Komo egzempyo unas, dos koplas de Salonik: Mi Espoza esta en el Rio:
Mi espoza esta en el rio/ Kon un vestido de amariyo/ Echate i alkansaras... / Mi espozika esta en el banyo/ Kon un vestido de al i blanko/ Echate i... / Entre la mar i la arena / Mos kresio un arvol de kanela / Echate i ..../ Si por echar, yo bien me echava, / Si mi madre lesensia me dava....
Profitando ke estamos en Salonik, terminaremos kon un pasaje de un artikolo vyejo miyo (El Amaneser No. 24), los aparejos de bodas tan pitoreskas. Antes de todo era el “banyo de boda”, una verdadera seremoniya. La novya, las famiyas, la madre del novyo, amigas se arrekojiyan en el “Hamam” para aparar el ashugar. Kantavan kantikas de boda, baylavan akompanyadas de una banda de muzika kompuesta de mujeres. Despues, la novya vestida de blanko, endjoyada, las unyas pintadas koroladas, la kara tapada kon el “velo” largo ke lo teniyan dos tres kriaturas... El Rabbino bendeziya los novyos debasho la “Kupa”. Los syete diyas despues la boda era “Huppa”, los envitados no mankavan. Uzavan a servir unos biskochikos redondos “tamelas” ke untavan aryento el kafiko...” Eyos tengan byen i mozos tambyen....
