La muerte de un grande Ombre de byen

Klara PERAHYA Judeo-Espanyol
20 Ekim 2010 Çarşamba

La semana pasada Salamon Çakım serro sus ojos por syempre, entornado de la maraviyoza kerensya de su mujer i su ija i del kudyo insesante de su ijo.

Kuando me lo anunsyaron, al empesijo no kije kreer, uvo en mi komo un refuzo de admeter ke este ombre tan fuerte i enerjiko, syempre pronto a koryer para ayudar no esta mas entre mozotros.

En todo kavzo, muestra komunidad vyene de pedrer uno de sus myembros los mas aktivos en el kampo de la karidad i de la solidaridad humana.

No lavorimos nunka en la mizma Ovra, ma tuvimos munchas vezes la okazyon de diskutir kon el sovre los mizmos kavzos, de bushkar endjuntos solusyones para los mizmos problemas i syempre yo fui testiga de la justesa de sus refleksyones i sovre todo de su profunda komprensyon humana.

El fue por un largo tyempo un briyante prezidente del “İhtiyarlık Yurdu” ma nunka unikamente enfohado  en su sola responsabilidad de shefe de esta maraviyoza ovra; el supo syempre kedar avyerto a kualkyer problema humano kual ke huera, syempre pronto a responder, syempre pronto a akudir.

A su mujer, su ija i su ijo ,sus inyetos i inyetas, ansi ke a todos sus serkanos, la ekspresyon de muestra profunda tristesa i muestras sinseras kondolensas.