Un dokumento de grande importansa remetido al Memoryal de la Shoah

Klara PERAHYA Judeo-Espanyol
13 Ekim 2010 Çarşamba

Temprano o tadre, ande ke vayga el ombre, sus aktos lo persigen.           

 

El avokato Serge Klarsfeld  (persigidor de los kriminales nazis i fundador de la “Asosyasyon de los İjos i İjas de deportados”) anunsyo ke un dokumento orijinal del Estado Fransez datado del anyo 1940, establesyendo el estatuto de los djudyos en Fransya durante la gerra (dokumento anotado i renforsado de la mano mizma del Mareshal Petain el kual enduresyo ainda mas las mezuras antisemitas preskritas por los nazis kontra los djudyos), fue deskovyerto i otentifyado por un grafologo.

Este dokumento fue entregado por un donador anonimo  al Memoryal de la Shoaha.

A kondisyon ke la otentisidad de la eskritura del mareshal sea de muevo atestada por dos o tres otros grafologes, esta pyesa sera una prova  tanjible i irrefutavle, de la partisipasyon personal i voluntarya del Mareshal a la deportasyon de miles de djudyos ke se topavan entonses en Fransya, evenemento ke konstituira una mancha indeleble sovre la memorya del grande kapo militaryo konsiderado ainda oy komo unikamente  el “Eroe de la primera gerra mundyal” ...

El ainda tyene multiples admiradores en la populasyon Franseza, algunos de entre eyos pretenden mizmo ke si el entrego multiples djudyos  estranjeros o muevamente naturalizados, esto fue echo en el objetivo  de salvar los otoktones.

De Gaule, de su parte, avia refuzado de egzekutir la kondenasyon a muerte  pronunsyad  kontra Petain,  afin de asegurar la koezyon entre”los fransezes  ke akseptaron mas o menos la dominasyon almana” i “los ke rezistyeron”.

I mizmo, pokos anyos antes, durante su governansa del payis, el prezidente Mitterand ,el personalmente, metia munchas vezes flores sovre la tomba del Mareshal.

Una kestyon mos vyene al tino “eske una kondenasyon moral post morten”  tyene importansa? Por seguro “Si”.

El ke ainda es unikamente konsiderado de la parte de munchas personas, komo “un grande ombre”, no puedra mas pasar a la historya solamente komo el vensedor  de 1914-1918, ma tambyen komo un partisipante aktivo i mizmo se puede dizir voluntaryo al mas grande krimen de la Historya.

La importansya de este dokumento (a la kondisyon ke otros grafologos tambyen konfirman la otentisidad de la eskritura de las anatasyones echas de la mano  de Petain enduresyendo ainda mas el estatuto impozado por el okupante) sera muy grande

Si es djustifikada i djustamente aplikada en una proporsyon  humana, una punisyon sovre todo moral no es un akto de vengansa ma de pedagojia, partikularmente para los tyempos a venir.

 Komo lo dishe mas arriva “ Temprano o tadre , ande ke vaya el ombre, sus aktos lo persigen”.