Oy, no teniendo un sujeto espesifiko pensi azer un poko de moabet i a la okazyon unas, dos kritikas. A la verdad dizir, no es ke me plaze kritikar afilu si no esto syempre de la mizma idea del de enfrente. No diskuto muy demaziya para a konvenserlo. Naturalmente, esto no kere dizir ke yo troko mi opinion. Simplemente prefero no insistir. La sola koza ke me dezrepoza es el safek de azer yerros importantes kuando avlo o eskrivo. Porke ize esta introduksyon?... Kaminando i avlando!!
En estos ultimos mezes, por siguro los lektores remarkariyan ke eskrivi bastante sovre Estambol, Galata en partikolar. A tal grado ke una amiga se takileyo kon mi dizyendome: “Coya, me parese ke ya eskrivites tanto por Estambol, ke ya puedes kitar un livro!!” Siguro, era shaka. Ay sujetos ke egzijan una bushkidad seryoza i intensa. Sin alavarme, puedo afirmar ke so muy metikoloza i miro a evitar yerros espesyalmente istorikos. Portanto, malgrado esto ya afita ke ago yerros.
En uno de mis ultimos artikolos nombri el Imperio Bizantino i el Otomano ke suksedo. Eskrivi por Binyamin mi Tudela ke fue el primer viyajador del Oksidente a ir asta la frontiera de China. Vino tambien a Constantinople ambezarse sovre la vida de los djudios de la epoka. Fue ansi, kon una asosyasyon de ideas (çağrışım) ke pensi a Marco Polo. El tambien fue un viyajador ilustro kon sus viyajes a los paises asiatikos i espesyalmente la China ande sejorno un largo tyempo. Vijito tambien Constantinople.
Bueno, egzaktamente en este punto aviya remarkado un grande yerro en un manadero konsiderado komo muy seryozo i “fiavle?”. Esta dizyendo ke Marco Polo estuvo en Constantinople en los anyos 1250 i ampeso al komercho de espesyas (baharat) en Galata. Esto es enteramente yerrado syendo ke la data de nasimiento de M.Polo es 1254!. Es egzakto ke el, en su retorno a Venezia de los viajes ke izo en los paises Asiatikos, partikolarmente la China, estuvo de pasaje en Constantinople verso la fin del 13. Siglo.
De otra parte, tambien es egzakto ke los “Ermanos Polo”, kere dizir el padre i el tiyo de Marco aziyan merkanseriya kon el Oriente. Ansi aviyan echo fama i grande fortuna en Constantinople. Myentres la epoka de konfuzyon i pletos ke reynavan en el Imperio Bizantino, los ermanos Polo vendyeron lo ke posedavan para pueder investisirlo en pyedras presyozas. Estos eventos deven koensidar mas o menos kon la epoka ke vinyeron los Genovezos (Cenevizler) a Constantinople i fondaron sus Koloniya en Galata...
Agora ampesi a realizar el buto de este artikolo miyo de oy: avlar de los yerros ke puedemos azer mozotros los amatores. Asta agora no saviya ke titolo dar al teksto. Ansi lo topi!! Me ambezi ke no kale muncho (o syempre) fiarmos a todas las informasyones del Internet. Komo ke esto sintyendo los protestos de syertos lektores. Yo es solamente un chiko “akavido” (uyarı) ke ize bazandome sovre mis eksperyensas. Por esta razon miro de bushkar i otros manaderos i meldo bastante.
Antes 4-5 anyos yo ize yerro de data en mi artikolo sovre la primera aparisyon del “Şalom”. El anyo 1947 syempre lo supe, porke fui personelmente testigo de los esforsos del Sr. Avram Leyon (de b.m). Eramos vizinos i se frekuentevan muy bien kon mi padre. El yerro miyo fue de eskrivir 20 Oktobre al lugar de 29. Oy en diya me syento konfuza kuando me lo akodro. Ma, kreevos keridos amigos, yo akeya data de 20 Oktobre la tomi de un artikolo sinyado de un nombre muy, muy siguro. Munchas vezes pensi ke esta persona no se pudiya yerrarse a tal grado. Konklui ke deviya ser un yerro de imprimeriya de la revista ande lo meldi. Mi kulpa fue de no kontrolar. Esto kedo komo una lisyon para mi.
