La semana pasada tuve la okazyon de segir en un programa de la Televizyon Franseza una entrevista muy interesante i (en mizmo tyempo) muy sorprendyente entre un djornalisto del posto T.V.5 i el grande eskritor Jean d’Ormesson.
Autor de multiples livros sovre diferentes sujetos, Jean d’Ormesson es una persona muy pozitiva, de un realizmo syempre imprenyado de esforso de komprensyon, syempre tornado verso el avenir todo en no pedriendo el kontakto kon el pasado, syempre sonriente a 86 anyos, el esprito klaro i la palavra dulse.
El destino, es verdad, lo arregalo de una vida muy rika en akontesimyentos agradavles. Nasido al seno de una famiya al pareser bastante rika i de orijen novle, de un fiziko muy amavle, intelijente i kultivado, intelektualmente muy kuryozo, syempre avyerto a muevas ideas ke el nunka arrondja sin averlas analizado kon benevolensya, este autor de livros muy interesantes fue kaji kontinualmente muy apresyado de la parte de su entorno serkano komo tambyen de la mayoria de sus lektores.
No mos olvidarermos ke (komo lo aviamos eskrito ay de esto unos kuantos mezes en esta mizma pajina) Jean d’Ormesson, myembro de la afamada Akademia Franseza, avia sido kargado de resivir Simone Veil al seno de esta grande Institusyon i el lo izo kon muncho respekto i admirasyon personal por la ke es aktualmente la prézidente de honor de la “Fundasyon para la Memorya de la Shoah”.
En su diskorso de byen-venida el tuvo estas palavras inolvidables para mozotros djudyos : ‘’Madam, kon vozotros entra en esta prestijyoza İnstitusyon la memorya de la Shoa’’.
Aunke bastante aedado, el kontinua syempre a eskrivir i syempre a gozar de la vida ; ma kuando a un syerto momento el djornalisto le demando si despues de su muerte el dezeava revenir de muevo a la vida, el respondyo: - No … Es verdad kel destino fue muy klemente kon mi, ma basta.... la muerte es una koza nesesarya.
Ke kijo dezir? Deke este ombre byen konosido, perfektemente lusido, sentimentalmente i fizikamente realmente kolmado por los syelos, este ombre ainda yeno de entuzyasmo por los plazeres terrestres, dyo semejante repuesta? deke esta lasitud de la vida kuando ainda a la edad de mas de ochenta anyos el proyeta kon la mizma ardor, eskrivir muevos livros?
