Desde unas kuantas dekadas estamos inkontestavlemente bivyendo en un siglo de movimyento kontinuo. l ken dize movimyento, dize munchas vezes “Evolusyon o byen Instabilidad”. Ansi, en munchos kavzos la mentira de ayer puede devenir la verdad de amanyana…
No se trata unikamente de evolusyones syentifikas o teknikas ma tambyen de evolusyon en el “orden sosyal”, lo ke realmente es un grande paso en el kampo de la sivilizasyon, ma ke nesesita syempre una refleksyon profunda i minusyoza no solo konsernando los provechos, ma tambyen las konsekuensas de kada uno de estos trokamyentos insesantes.
Una mueva deskovyerta en kualkyer kampo de la syensya, komo igualmente una mueva ley o un muevo dekreto sosyal, malgrado su valor intrenseka, puede dar en el futuro rezultados imprevizivles…
No se trata para mozotros de detener o ralentisar kualkyer movimyento de progreso, ma simplemente de ser muy prekosyonozos i kudyozos en sus promulgasyon komo en sus aplikasyon.
En este momento, el Oriente Medyo esta en estado de ebulisyon, se syente ke un muevo orden sosyal va surjir, ma no se save lo ke el sera. “Una avyertura a muevas ideas sin, por esto, trahisar los kriteryos morales de baza?” O byen “un renforsamyento eksesivo de syertos preseptos sosyo-kulturales o sosyo-relijyozos?” El futuro mo lo dizera.
Kale admeter ke no es solo en el Oriente Medyo Arabo ke semblables trokamyentos se pasan, ma un poko en kada lugar del mundo, los unos klaramente definidos, los otros ainda ezitantes i a penas perseptibles.
La eskolarizasyon obligatorya jugo por seguro un rolo preponderante, muevos orizentes se avyeron delantre puevlos enserrados asta agora en vyejos uzos i tradisyones, entre los kualos se puede topar, algunos enteramente kadukos i mizmo alterados por un ekseso de interpretasyon.
En las linguas latinas, la palavra “revolusyon” es fonetikamente muy serkana de la palavra “evolusyon”, una sola letra las diferensya, el simple “r” del empesijo, i esta letra es muy importante… La kondisyon prinsipal para ke una revolusyon devenga una verdadera evolusyon i ansi un real adelantamyento, es sin dubyo la introduksyon de una refleksyon ke se esforsara de ser imparsyal i objetiva.
No mos olvidaremos ke munchas kozas ke reprezentavan valores presyozas en los tyempos pasados, pudyeron pedrer oy en dia sus kualidad de aktualidad, i ansi “engancharmos a eyas” seria kaji retrogradar.
En desparte de las ke son klaramente formuladas en la “Syete Leyes de Noah” pronunsyadas en direksyon del universo entero, i ke son de una perenidad irrefutavle, pokos son los prinsipyos sosyales ke yevan en eyos una Verdad eternal … el tyempo se karga kaji syempre de introduzir elementos muevos, potensyalmente pozitivos o negativos, segun las sirkunstansyas.
Fue munchas vezes ansi, mizmo en la Evropa ke fue a un syerto momento la kuna de la sivilizasyon. Por egzempyo: ay de esto unos kuantos anyos, fue promulgada, grasyas a la inisyativa del grande Avokato Fransez Robert Badinter: “la abolisyon de la pena de muerte ansi ke del enkarselamyento a perpetuidad” lo ke realmente reprezenta una desizyon de grande humanizmo, ke refuza de kondenar irrevokablemente una persona, kuala sea su kulpa, sin desharle la posibilidad de un kualkyer arrepentimyento i reparasyon.
Esta Ley es,sin dubyo, de un alto nivel umanitaryo, ma nada keda univoko a traves los anyos ke pasan…
Ansi, ay de esto dos o tres semanas, en Fransya, un inkulpado kondenado i enkarselado por abuzos i asaltos seksuales ma ke (debasho un razonamyento muy astusyozo ke no es posivle de definir) tuvo durante un largo tyempo en prizyon, una kondukta egzemplarya, lo ke dyo la impresyon de una mejoria definitiva de su estado, fue liberado, malgrado los preavizos de la parte de su propya famiya de una posibilidad de residivo.
Poko tyempo despues de su liberasyon (se supoza debasho un muevo impulso seksual i kriminal irrezistivle) el mizmo inkulpado ke fue liberado puede ser prematureamente, asalto de muevo una adolesente, la violo i la mato de una manera salvaje…
Komo djuzgar este kavzo? i partikularmente las personas ke por induljensya i grande klemensa, fueron involuntaryamente la kavza indirekta de un muevo krimen?
Ma terminaremos esta eskrita kon dos faktos ke me prokuraron una grande alegria:
(Primo) En la Prensa eskrita Franseza komo tambyen en la Televizyon de munchos otros payizes Evropeos, la Turkia debasho la governansa del AKP es kontinualmente sitada komo el solo payis Muzulmano enteramente demokratiko, todo en kedando fidel a los preseptos de su reljyon i en respektando en mizmo tyempo las diferentes kreensas de sus minoridades.
(Segondo) En Israel, se syente un chiko ablandamyento en el rigorizmo relijyozo del “SHAS” (partido super-hasidiko sefarad debasho la prezidensya de Rav Ovadya Yossef) grasyas a las intervensyones kontinuales del Rabbino Haim Amsalem, myembro influente de este mizmo partido, el kual aunke fuertemente atado a los preseptos del Djudaizmo relijyozo, prekoniza una vizyon mas klemente en la kestyon de la konversyon de miles i miles de imigrantes djudyos venidos de la “eks-Unyon Sovietika’, konsiderados halashikamente no-djudyos, lo ke (segun el) puede danyar las prinsipales egzijensyas del Djudaizmo otentiko, ke son etikas i humanitaryas.
El segundo objetivo del Rabino Amsalem es de kombatir la voluntad del Shefe ultra relijyozo Ashkenaz de Lituania ke enkoraja sus adeptos a evitar de kumplir sus servisyo militar, i a no konsakrar sus tyempo a kualkyer lavoro otro kel estudyo de la Thora, enkorajamyento ke kontribue a mentener la komunidad en un estado perpetual de provedad
Todo en insistyendo sovre su respekto personal i su fidelidad absoluta al shefe espiritual del partido SHAS, el Rabbino Haim Ansalem repeta ke la ultra-ortodoksia inspirada de la ideolojia lituanyana va kontra los prinsipyos fundamentales del Djudaizmo, los kualos ovligan moralmente kada padre de ansenyar un ofisyo a sus ijos afin ke eyos puedan ganar a la sudor de sus frente, el pan kotidyano.
Parafrazando la ermoza palavra del biolojisto Jean Rostand ke anyos antes avia dicho” la syensya devino tan fuerte ke eya no puede mas permeterse de no ser vertuoza”, puedemos a muestro torno dezir kon otros byervos: “El avenir de la humanidad devino tan instable, ke ninguno tyene el derecho de mankar de refleksyon i sovre todo de esforso de komprensyon enverso los otros”.
