Ayer i oy Nıshantash -1

Coya DELEVİ Judeo-Espanyol
2 Şubat 2011 Çarşamba

El nombre del sentro famozo vyene del “Obelisko”, al kruazamiento de las avenidas Vali Konağı-Rumeli Cad.i Teshvikiye. Antes 8-9 anyos, el Sr. Mustafa Sarıgül, prezidente de la Munisipalidad de Shishli, disho: “Nishantash un diya se va azer Champs Elysées...”. Sintyendo estas palavras, akeya epoka ize un teksto sovre el distrikto. Era dayinda mi sigundo o treser anyo en esta pajina. En rezume, relati lo ke saviya sovre la Istorya de aki, de su aparensya en el 19. Siglo i su estado aktual.

Despues meldi artikolos i tomi notisyas. Pensi ke meskladas kon mis rekuerdos puedo azer un muevo teksto sovre el sentro. Me ambezi ke Nishantash i Teshvikiye fueron kaji los primeros distriktos ande empeso la “moda”! o uzansa de mantener (elevar??) gatikos, perrikos en kaza.

En los bodres de los “tepes” (chikas kolinas) abashando de Fulya a Beshiktash, aviya nombrozas “mandras”. Ayi se aziya importante produksyon de kezos i yogurt ke se vendiyan en el derredor. Me akodro el presipyo de los 1950. Moravamos en el distrikto i tuve la okazyon de ver, si no mandras, ma syertas barakas aryento de vedruras detras el Espital Amerikano. Eran muy serka de muestra kaza de akeya epoka i  ivamos a merkar legumbres o guevos freskos de los gayneros.

En el Enero del anyo 60 pasimos al edifisyo ande moramos agora desde djusto 50 anyos. Es muy serka tambien del Espital Amerikano i de Beshiktash. Deke esto insistyendo sovre el lugar? Es importante para pueder dar a entender syertos puntos. Akeyos anyos afilu, alkansi a ver en el kuartiyer “Topağacı” fraguas en tavla. En el sensyo unik de la abashada para Beshiktas, espesyalmente a la derecha no aviya estos todos apartamentos. Aviya unas, dos guertas ande yevavamos a las kriaturas. Myentres ke eyos djugavan, las madres beviyamos un chay o gazoz...

Profitando ke estamos djustamente en este lugar (Topağacı) kero avlar de la fotografiya. Komo se esta remarkando, la vista de Topağacı en los 40 era muy diferente de la de oy. En el lugar ande se esta vyendo la kaza a la derecha, oy se topa el apartamento Lofça Palas. Kreo ke syertos lektores konosen bien el kuartiyer.

Tambien kero avlar de otra fragua en tavla, importante a la epoka. Se trata del “Halil Rıfat Pasha Konağı”, ande el Liseo “Şişli Terakki” dyo ensenyamiento. Este konak se izo despues el “Kindergarten” del Şişli Terakki. Lo konosi bastante, syendo ke mi ijo en el anyo 58 (o 59) se fue a esta kresh ke era a dos pasos de muestro primer domisilyo. Aktualmente en esta plasa se topa un chiko parko para los ninyos i los aedados!!. Es tambien komo un pasaj para salir a la avenida prinsipal.

Antes de kontinuar devo prechizar ke me aprovechi de las ilustrasyones  del investigador Sr. Burak Çetintaş, i un poko de sus linyas sovre los detalyos enteresantes del pasado de Nishantash ke vo relatar. Myentres el reyno de los Sultanes Selim III i Mahmud II, (ultimos anyos del 18. i presipyo del 19. siglos) el Sentro era kompletamente despovlado. Era el lugar favorito del Sultan Selim para sus tornos de “ekitasyon”.

En la plasa ande oy se topa la Teshvikiye Camii, izo fraguar un chiko “Namazgah”(espasyo de orasyon). En desparte, lo ke aviya era solo una kuliba de tavla en medyo de las vinyas a las abashadas de Topağacı. El distrikto era muy propisyo a egzersizyos de tiro i antrenamiento militar. Ansi la Armada Otomana, enfortesida kon maneras i ekipamientos modernos, uzava antrenarse a tirar en las alturas del distrikto. De aya puede ser el nombre “Nishantash”.

Bueno, kuando esta aparensya desho el lugar a koshkes i abitasyones manyifikas?..

(a kontinuar)