I vino para alegrar la kriansa humana
Debasho este titulo, Defne Amado “Neurology MD.P.H.D. of Neuro Science” de la famoza “University of Pensilvanya” (inyeta de Leyla i Dr. Elie Behmoaras) realizo un lavoro muy interesante sovre el ritual del vino en las fyestas djudias i partikolarmente en el Kidush de Noche Shabat.
No se si es un azardo, ay de la parte de numerozos savyos ke profesan la medikeria o un ramo de esta syensya, un interes espesyal por todo lo ke es en raporto kon los problemas pslkolojikos i sosyales de la kriansa humana, su vida koryente, sus simples refleksyones kotidyanas komo tambyen sus konsepsyones filozofikas.
No se trata de una obsesyon profesyonal ma, kale ke sea a la sigida de una proksimidad kontinual kon la sufriansa humana, eyos son de una sensibilidad partikular enverso todo lo ke konserna el ombre: sus kreensas, rituales, uzos i kostumbres ets...
Ansi ke lo meti komo epigrafo al prisipyo de esta eskrita, Defne Amado mos dize “I vino para alegrar la kriansa humana”. Eya empesa su lavoro kon estas linyas de las kualas vos do una traduksyon aproksimativa en Djudeo-Espanyol”
“El Djudaismo tyene una erensya kultural i relijyoza del Vino de una rikeza kaji unika. En la selebrasyon del Shabat komo kaji en todas las fyestas, el vino es prezente. Se avla de vino en los tekstos ebreos los mas ansyanos. En el Pentatok (los sinko livros santos de la Biblia) el es mensyonado en diferentes kontekstos ke van de “los agradesimyentos i lores al Dyo” asta las simples okazyones de alegria de la vida koryente.
Aunke la relasyon uzual djudia kon el vino es la mas parte del tyempo pozitiva, su abuzo es konsiderado komo negativo en varyas okazyones, lo ke prova el epizodyo de Noah ke kayo en una postura kaji desgradante por aver djustamente egzajerado la konsomasyon de este beveraje”
Defne Amado estudyo esta ambiguidad evidente del vino en la Biblia komo tambyen en el Talmud...Eya mos dize: “Komo alora konsiderar este beveraje ke es en mizmo tyempo de una importansa inkontestavle en muestro ritual relijyozo i tambyen muy danjerozo?”
En rezumen, eya mos ambeza kel rolo del vino fue interpretado syempre de una manera variable. Segun munchos savyos, el era un beveraje regalyano destinado a la sanktifikasyon del nombre de Dyo, para otros: un elemento ke komporta un syerto rezikozo.
Munchos pensan ke malgrado su rolo importante en la sanktifikasyon de muestro agradesimyento al Todo Poderoso, el puede tambyen ser kaji una amenaza potensyal para la konservasyon absoluta de la integridad del Djudaizmo, a la sigida de la intimidad ke el tyene la posibilidad de establesar (en los momentos de euforia eksesiva) entre personas de orijenes diferentes.
Defne Amado mos da ansi la repuesta a una kestyon ke aktualmente mos interpela kon frekuensa: “ deke egziste en muestra relijyon la interdiksyon de la manipulasyon del vino konsagrado al Kidush de Noche de Shabat por personas ke no son de muestra konfesyon?”
Este espanto de una alterasyon de la integridad de muestro ritual relijyozo no konserna direktamente la bevyenda en si mizmo ke syempre guadra su kualidad de novlesa, ma simplemente el estado de ebriedad ande el ombre puede pyedrer envezes su ekilibro intelektual i emosyonal.
Ansi, una vez mas, sentimos surjir en muestro espirito el tema de la ambivalensya de kada koza, sus dos fachas, la una pozitiva, la otra negativa, lo ke egzije de mozotros la “Djusta Mezura” en kuala sirkunstansya ke sea.
Ay ainda muncho a sitar en el teksto de Defne Amado kon sus referensyas biblikas i talmudikas ke konfirman la otentisidad de todo lo ke eya dize, ma malorozamente por faltura de espasyo en esta unika pajina del hebdomadaryo Şalom ke mos es akordada, me topo en el ovligo de konkluir. Fue para mi un muy grande plazer de meldar este teksto de Defne konsernando el ritual i los uzos de muestros antepasados, estudyo echo kon la objektividad absoluta ke la syensya egzije por kualker lavoro de investigasyon, teksto eskrito de la parte de una jovena syentifika, ija de una famiya en mizmo tyempo tradisyonalista i rasyonalista, enteramente avyerta al mundo evolutivo moderno sin por esto renyegar el pasado.
