La valor de la palavra

‘Kedar kayado i no protestar delantre una indjustisya’ es kaji un konsentimyento tasito ke kompromete muestra responsabilidad. Ansi ‘Luchar kontra el mal, ande ke se tope, i kualas  sean muestras posibilidades de venserlo’ es sin dubyo uno de los mas grandes doveres de la kriansa pensante

Klara PERAHYA Judeo-Espanyol
27 Ocak 2011 Perşembe

La Shoa ambezo al puevlo djudyo a no abokar la kavesa.

Aunke un vyejo proverbyo mos dize “Si la palavra es de plata, el silensyo es de oro”, en munchas sirkunstansyas, kayarse  delantre  desizyones ke savemos ser falsas, sinyifika achetarlas.

Despues de milenaryos  de sufriensa ke fue el destino del puevlo djudyo, ‘el’  entendyo  enfin ke  someterse syegamente, sin la mas chika protestasyon ni el meno djesto de defensya, es kaji un akto de suisidyo, i mizmo un djenero de traisyon enverso si mizmo.

Es evidente ke todos los kavzos no son syempre los mizmos, ma munchos de entre eyos egzijen imperativamente una intervensyon  bazada por seguro  sovre  elementos  huertes de defensa lejitima.

Es ansi de dos kavzos ke se produzyeron estos ultimos dias en la sosyedad djudia de Fransya.

 El primer  me ovliga a revenir sovre mi presedente  eskrita   konsernando  el inoportuno i tambyen ‘afuera lugar’ grito de  indinyasyon  kontra Israel de la parte de Stephane Hessel, sin tomar en konsiderasyon las sirkunstansyas en las kualas  este  payis se topa  ni el odyo kel lo entorna i lo ovliga a egzersar enverso los otros una severidad ke puede pareser eksesiva kuando no se konose a fundo el problema, 

Verso la fin de la semana pasada, este mizmo sinyor aedado de 93 anyos i sus amigos (entre los kualos Leila Shait delegada de la autoridad Palestinyana en Bruxelles ansi ke unos kuantos  ultra pasifistos Israelyanos )se esforsaron de organizar en la prestijyoza “ Eskola Normal Superyor ” de Paris, un  djenero de kolokyo entre personas todas  de mizmo avizo   afin de yamar esta vez la manseves  Franseza a boykotar los produktos Israelyanos.

Ma, a la sigida de  la intervensyon del prezidente del Crif ‘Richard Prasquier’ ansi ke de los filozofos Alain Finkielkraut, Bernard Henry Levi i Claude Cohen Tannoudi, todos los tres ansyanos elevos de la “Eskola Normal Superyor’’, el kavzo fue sometido a  Valerie Pecresse, Ministra Franseza de la Ensenyansa Superyor,  ke eya tambyen konsidero un semejante panel enteramente unilateral  i no permetyo su realizasyon.

El segundo kavzo enteramente differente tyene komo aktor prinsipal  Serge Klarsfeld  ke ekspreso kon fuersa su revolta kuando se ambezo  kel nombre de  Louis Ferdinand Celine, famozo eskritor Fransez ,selebre por la eksepsyonal  kualidad de su estilo  ma terrivlemente antisemito i grande amigo de los almanes durante la segunda gerra mundyal , iva figurar en el volumen de las selebrasyones Nasyonales 2011 ke onora la memorya de  Ombres de grande merito.

El Ministro de la kultura Franseza  ‘Frederic Miterand’ oyo su grito de protestasyon i sin tadrar tomo la desizyon de  kitar  el nombre de este grande eskritor,  del volumen de selebrasyones Nasyonales 2011 ,  del kual el mizmo avia sinyado el prologo.

Una vez mas, los eventos mos ambezaron ke kuando es nesesaryo, luchar es muestro primer dever afin de asegurar la perenidad de muestro puevlo.