Komo lo eskrivyo la semana pasada el presedente Prezidente de muestra Kolektividad ‘Sllvyo Ovadya’, muestra komunidad esta fyestando estos dias el 150en anniversaryo de la fundasyon de la selebre “Alliance Israelite Universelle”.
“La Aliansa” komo la yamavan muestros avuelos, es una Institusyon kultural Djudia kreada en Fransya en el anyo 1860 por grandes filantropos i intelektuales djudyos, a la sigida de evenementos antisemites sanglantes i muy graves ke akontesyeron en 1840 en Damas , ansi ke de la konversyon forsada al Kristyanizmo en 1858 de un ninyo nombrado Edgard de Mortara.
Segun lo ke mos ambezan diferentes tekstos konsernando este sujeto: En 1863, esta grande Asosyasyon tuvo komo prezidente el afamado ‘Adolphe Crémieux’ i en 1943 el grande Juristo René Cassin, Shefe- redaktor de la “Deklarasyon Universal de los Derechos del Ombre”.
Komo fue dicho mas arriva, eya fue la Ovra de altas personalidades de Fransya ke tomaron entonses la desizyon de ayudar sus ermanos en estado de prekaridad, esparzidos en diferentes payizes del mundo, afin de luchar kontra el odyo i la indjustisya ke los persigia, i en este eskopo krearon un fondo de apoyo a sus profito.
“La Aliansa” tuvo dos funksyones prinsipales: “İntervenir serka de las otoridades politikas en ke lugar del mundo ke fuera, en favor de los djudyos persekutidos” i “desvelopar un sistema eskolaryo en el buto de modernizar los djudyos ke se topavan en el Oriente i en los Balkanes, afin de aktivar i anchear ansi sus adelantamyento i emansipasyon”.
El objetivo de la Aliansa era entonses de ayudar los djudyos poko evoluados de la klasa ekonomikamente flaka, a salir del estado de “enserramyento sovre eyos mizmos” ande se topavan, limitados por los uzos, kostumbres i tradisyones ansestrales ke prevalian antes de todo para eyos, en azyendoles konoser la kultura franseza. No mos olvidaremos ke es grasyas a las eskolas ke esta grande Institusyon instalo en varyas sivdades del Oriente Medyo, ke verso la fin del siglo 19, ninyos i ninyas de muestra komunidad, kondenados komo sus jenitores a bivir en una inyoransa pasiva, tuvyeron la posivilidad de salvarsen del analfabetismo i avrirsen ansi al mundo eksteryor, lo ke les izo deskuvrir orizontes muevos.
En desparte de esto, la Alliance Israelite Universelle de Paris poseda una importante kuantidad de arshivos del Djudaizmo mundyal, entre los kualos 300.000 dokumentos konsernando muestra komunidad de Turkia, de los kualos una kopya mos sera remetida, lo ke fasilitara muncho syertas investigasyones historikas.
A la okozyon del aniversaryo de los 150 anyos de egzistensya de esta presyoza İnstitusyon, muestra Komunidad esta avyendo una ekspozisyon relatando su presyoza aktividad, djueves el 6 asta el 30 del mez koryente en el Sentro kultural del Schneidertempel, en prezensya de los resposavles de los Arshivos i Bibliotekas de la Aliansa ‘Jean Claude Kupermince’ i ‘Ariel Danan’, loskualos daran Lunes el 10/1 una konferensya sovre “la Alliance i su aktividad en Turkia” en el Sentro Fransez.
Todos los myembros de muestra komunidad i partikularmente los ke, en sus chikes, frekuentaron una de estas eskolas son kalorozamente kombidados a asistir.
