La semana pasada tuve la okazyon de meldar en el ultimo numero de la revista ”Information Juive” un muy interesante artikolo sovre una entrevista echa kon Michael Löwy (sosyologo i filozofo Franko-Brezilyano, direktor emeritus de investigasyon en el CNRS, Profesor en la prestijyoza universidad Franseza EHESS, autor de un analizis del Hasidizmo del grande pensador Martin Buber) i dezeo partajar kon muestro lektores unos kuantos pasajes de lo ke me ambezi.
Segun Michael Löwy : Martin Buber renovelo la espiritualidad Djudia moderna. El Djudaizmo ke el propoza es diferente de las doktrinas klasikas, difererente de la ortodoksia rabbinika komo tambyen del liberalizmo asimilado.
Buber no se intereso a la relijyon rasyonal de Maimonides ni a los debates juridikos del Talmud, su atensyon se fokalizo sovre el Mistisizmo, el Hasidizmo i partikularmente el Mesyanizmo.
Para el grande filozofo, la idea la mas profunda del Judaizmo es la aspirasyon por la realizasyon de “un mundo de Unidad”. El propoza una konsepsyon profundamente revolusyonarya de la komunidad: “una entidad mesyanika ke no se situara en el mundo a venir, ma en el muestro, aki, sovre esta tyerra”, en un mundo ande el pasado i el futuro seran atados el uno al otro, i ke sera el mundo de todas las libertades.
Buber mos dize ke la komunidad klasika es un universo de ovligasyon ande prevale solo una sola “Palavra”, lakuala devino kaji un dogma. La ke el propoza sera ,eya, un mundo de la mas alta libertad, en el kual “la diversidad de opiyones” sera indispensavle.
Las komunidades ansyanas fueron fundadas sovre “la paryentes de sangre” , las ke el propoza lo seran sovre “la paryentes de afinidades”.
En una de sus eskritas datada del anyo 1919, el disho lo sigyente: ‘La esperansa de la venida del Mesiah’ es la esperansa de la venida de una semejante komunidad, ma al lugar de “esperansa” es de “aksyon” ke se deve avlar.
En 1938 el eskrivyo tambyen:”La humanidad se esta undyendo en una kriza de mas a mas grave ke es el rezultado de su inkapachita a pueder dominar el mundo ke eya mizma instituo. Este mundo devino mas fuerte ke eya .
Uno de los mensajes del Hasidizmo de Buber es ke la kriansa humana no es kondenada a la pasividad ni a la sola kontemplasyon, kada uno de entre mozotros deve intervenir afin de amejorar el mundo.
No mos olvidaremos ke Martin Buber fue syempre el filozofo del dialogo del “Yo i Tu”.