Todo lo ke semos se reflekta (konsyentemente o inkonsyentemente) en lo ke azemos. Ay aktos ke son komo los testigos de la personalidad de un ombre komo de una mujer.
Ansi es de Nüket Antebi ke kaji todos konosen de serka o de leshos, persona de voluntad fuerte, fidel al objetivo ke eya se impozo, voluntarya benevolente desde 25 anyos en la djestyon del Hospital Or-Ahayim, myembro permanente del Konsilyo administrativo i a un momento prezidente del grupo de damas, syempre perseverante i syempre asiduv a su voluntad de esparzir alegria en su entorno.
La semana pasada, eya i su marido organizaron en el luksyozo restorante de karne ke les apartyene (despues de averlo “kasherizado” kon grande minusia)., un pranso enteramente asumido por eyos, ke fue ofresido a los partisipantes del grupo “Golden Age” de muestra komunidad.
Fue un dia de alegria i de gozo i tambyen de kerensya i de solidaridad... un dia ke tenia una sinyifikasyon muy profunda.
