“La bushkidad de la egualidad de derechos entre las personas” es la mas fuerte manifestasyon de una grande sivilizasyon
Un evento se produzyo la semana pasada en Israel, un simple evento a primera vista apresyavle byen entendido ma sin importansa partikular, del kual se avlo en la prensa Israelyana komo de un akontesimyento kazual, sin komentaryos espesyales.
“La Korte Suprema de la Djustisya Israelyana tomo una desizyon para la anulasyon de subvensyones nasyonales atribuidas unikamente a 10.000 estudyantes de Yeshivot”.
Esta desizyon sera konfirmada en la proksima votasyon del budjeto governomental
La gazeta “Jerusalem post” mos ambeza ke “Segun la Korte Judisyal de Israel, los prinsipyos juridikos ke se topan a la baza de esta vyeja desizyon de favoreser la ensenyansa relijyoza, son konsiderados aktualmente illejitimos, i no puedran dunke entrar en el budjeto del anyo 2011
Komo se entyende byen, manifestasyones de protestasyon fueron organizadas en Yerushalayim de la parte de la manseves relijyoza. El Ministro del İnteryor Eli Yishaï deklaro ke se trata de un golpe echo al “Estatuto-ko” espiritual i propozo ke su partido el “Shas” prezente un muevo proyeto afin de asegurar un revenido suplementaryo a los estudyantes de Yeshivot...
Se puede presentir kel tema prinsipal de esta desizyon de la Korte no es solo un simple fakto budjetaryo, ma muncho mas, kaji komo un punto de retorno de una situasyon ke repozava sovre una inegualidad de derechos.
Todos konosen la fuersa de la Djustisya Israelyana ke es kompletamente otonoma i ke baza sus desizyones prinsipalmente sovre la ekidad, eya mizma guardyana de la Etika Hebraika.
No mos olvidaremos ke 60 anyos antes, kuando se tomo la desizyon de akordar este privilejyo a las institusyones de ensenyansa relijyoza, la situasyon era enteramente diferente de la del tyempo aktual. El puevlo Djudyo venia de salir de la trajedia nazi, ferido en sus karnes, ansi ke en sus derechos vitales. El devia afirmar la valor de su relijyon i la intensidad de su apartenensya a una identidad profundamente Djudia.
Oy en dia, segun la prezidente de la Korte “Dorit Beinisch”, la ley no akorda ningun lugar a una distinksyon entre los estudyantes del Kollel i los estudyantes de otras institusyones eskolaryas.
El deputado Nitzan Horowitz del partido MERETZ saludo la desizyon de la Korte i disho “Un paso importante fue echo verso una real egualidad.
