En la trajedia de la mar mediteranea, ke gano Israel? Nada ..realmente nada.
Ke pedrio? muncho, por no dezir todo: a) la konsiderasyon i la komprensyon de las kualas el gozava al momento de su kreasyon i mizmo muncho despues, de la parte de una grande parte del mundo...b) la estima de sus amigos los mas sinseros .... “Es realmente muy dolorozo de tener a djuzgar los suyos”.
Natanyahu el mizmo formulo i repeto su grande pena por la muerte de las viktimas ... Al pareser, muncho mas ke una falta moral, el drama fue una falta de refleksyon en no savyendo preveer lo ke pudia afitar de imprevizivle i tambyen lo ke puede ser (a syertos momentos) la reaksyon de una persona ke se syente atakada djustamente o indjustamente kon varras de fyerro.
Shabat, a las una de medyo dia, estava djustamente pensando a esto, kuando el telefon se metyo a sonar .... una boz leshana, la de mi amiga Norma Anav instalada en Paris me disho “ avre presto “LCI” (LCI es un posto de la Televizyon Franseza).
Me apresuri de azerlo ... komo kada semana era el debate hebdomadaryo de “Luc Ferry” filozofo i vyejo Ministro Fransez liberal, katoliko i muy atado a su relijyon / kontra “Jacques Julliard” grande editoryalisto i profesor de Universidad, sosyalisto konvensido, katoliko de nasimyento sin ser partikularmente relijyozo; dos ombres muy sezudos i muy byen pensantes.
Aunke habitualmente antogonistos en sus opinyones, por una vez todos los dos defendyeron la mizma idea .”Todos los dos kondenaron kon fuersa la dezastroza inisyativa Israelyana, todos los dos akulparon la governansa aktual del payis, ma tambyen todos los dos manifestaron la mizma sorpreza delantre la intensidad inuzual de las olas de reprobasyon i kulpabilizasyon mundyal ande parese soplar komo un ayre de odyo” .
En efekto, deke kaji en el mundo entero este odyo, sin bushkar la mas chika razon atenuante en la situasyon kaotika ande se topa el Oriente Medyo?
Deke este aborresimyento intransijente i implakavle enverso un payis amenazado avyertamente de ser eliminado de la karta jeografika?
