La komunidad djudia de Turkia ekspreso su estima enverso su Shefe Espiritual Rav İsak Haleva

Klara PERAHYA Judeo-Espanyol
5 Mayıs 2010 Çarşamba

Alhad el 2 Mayo, 4.631 personas partisiparon a la votasyon del Gran Rabbino de Turkia. Las  4,268 votaron en favor de  Rav İsak Haleva.

Dos realidades fueron afirmadas ansi. Primo) la madurez de esprito sivil de la kolektividad Djudia de Turkia ke partisipo a esta votasyon en una proporsyon muncho mas grande komparativamente al pasado. Segundo) la afirmasyon del grande respekto ke esta mizma kolektividad resyente por su aktual Shefe Espiritual.

En su simplisidad, ay en Rav İsak Haleva  un sentimyento natural de amistad i karinyo, ansi ke una grande serkor afektiva enverso el poderozo komo enverso el mas humilde…İ por seguro es esto una parte del verdadero djudaizmo.

La estrikta observansa de los preseptos relijyozos es sin ningun dubyo imperativa, ma no syempre sufizante, ay tambyen la real sinyifikasyon de kada paragrafo de la Biblia, meldada no solo en su  literalidad ma en  su valor simbolika…En la antiguidad “la kayentor del resivo espontaneo de muestro Padre Abraham enverso los tres andjelos, los kualos se prezentaron a el debasho la aparensya de tres viajadores, tres pasantes por los kualos el  Profeta interrumpyo su meditasyon afin de mijor resivirlos i mijor servirlos” es muy probante. 

“Propozar (komo lo dize la Biblia) a  tres pasantes kansos i ambyertos, de lavarles los pyezes i aparejar para eyos komidas ke kalmaran sus ambre’’ sinyifika simbolikamente  la importansa del “ovligo de ayudo i de respekto”  enverso ken ke sea.

Este kudyo enverso kualkyer persona konosida o deskonosida, muestro Gran Rabbino lo tyene. Una de las palavras ke el emplea lo mas es “ermano”…I ay en esta palavra el konsepto de la kerensya enverso el otro.

La ermandad en su dimensyon afektiva es echa  de esforso de komprensyon del otro malgrado lo ke puede envezes desferensyarlo de mozotros. I munchas vezes se syente en muestro Shefe Espiritual este esforso afin de mijor  ayudar i mijor mostrar el kamino a segir .

Tuve munchas vezes la okazyon de demandarle konsejo  sovre  kavzos kompleksos i el me dyo kaji syempre repuestas klaras, sin ekivoko. Tambyen, a la sigida (kuando la okazyon se prezenteva) el nunka manko de demandarme komo evoluo tal o tal problema. 

Un Shefe Espiritual es esto, ser antes de todo un giador para su komunidad, ser avyerto a todos , esforsarse de entender kada uno en su espesifidad afin de mijor konsejar, mijor ayudar.

 Ke nunka el manke a la kavesa de muestra komunidad.