Shabat la noche fin del moratoryo de arrestar la konstruksyon de muevas fraguas isreaelyanas en Sisjordania i komo lo vimos a la Televizyon, los Israelyanos del lugar se apresuraron immedyatamente de empesar a kavakar la tyerra para echar los fundamyentos de una mueva “guadreria de ninyos”.
El “Jerusalempost” mos ambeza kel mizmo dia, Natanyahu konvoko sus konsejeros i entro en komunikasyon kon Ehud Barak (ke se topava entonses en los Estados Unidos) para diskutir a este sujeto i topar un kompromiso.
Mahmud Abbas, el, repeto ke no pudia aver akordo de paz sin prolungasyon del moratoryo. Israel deve eskojer entre la Paz i la kontinuasyon de implantasyones
Martes demanyana meldamos en el kotidyano Fransez “le Figaro”, ke Mahmud Abbas ke se topava entonses en Paris, no tyene la intisyon de interrumpir immedyatamento las negosyasyones direktas kon el Estado Djudyo. Los palestinyanos desidaran de kontinuar o no las konversasyones el 4 Oktobre despues de aver diskutido entre eyos i konsultado algunos estados Arabos.
En una konferensya de Prensa kon Nicolas Sarkozy, el Prezidente de la Autoridad palestinyana deklarao: devemos estudyar todas la reperkusyones de una kontinuasyon de la kolonizasyon.
Durante su estadia en Paris Mahmud Abbas tuvo tambyen una entrevista muy amigavle kon asosyasyones Djudias ke luchan por la Paz.