Lunes la noche, la famiya Matan-Baseter estava de muevo aunada en la guerta de atras del Barınyurt, debasho la sukkah… myembros del komite aktual i tambyen ansyanos ansi ke pansyonaryos aedados i mansevos, mesklados los unos a los otros en un a atmosfera de alegria i sovre todo de profunda amistad, komyeron i rieron endjunto.
No pude asistir por mezura de akavido, a mi edad devo tener kargo de mi salud, syento ke no tengo el derecho de azer la mas chika imprudensya por respekto enverso mis ijos ke estan todos por ahuera i mis amigos syempre tan kudyozos, ma mi korason estava serka de eyos, en esta vyeja fragua a un syerto momento sin puertas ni ventanas a la sigida de dos huegos i ke fue renovelada para devenir un abrigo humano.
Kuarenta anyos antes, el renovelamyento (grasyas a la inisyativa de Naim Güleryüz) de la Matan Baseter ke permetyo mas tadre la kreasyon del Barin Yurt, fue un djenero de milagro ke ainda kontinua i ke a kada trokamyento de komite se intensifika ainda mas.
Kada uno trae su partisipasyon. A lo vyejo se adjunta kontinualmente lo muevo, proyektos syempre mas performantes, realizasyones mas provechozas al servisyo de los ke entonses se topavan en una terrivle prekaridad.
Un sujeto sovre el kual revengo kon grande frekuensa es: “la valor de una komunidad, la valor de la komunidad de Estambol kon todo lo ke eya da a kada uno de mozotros”.
El Barınyurt komo tambyen el Hospital Orahaim i el Ihtiyarlar Yurdu no son solo fraguas echas de pyedra i simento, ma refujyos en la sufriensa i sovre todo en la soledad, esta soledad ke parese envezes apegarse al kuero de la persona i ke la persige despues la muerte de uno de los dos konsortes. Un vyejo refran Djudeo -Espanyol dize “No me yores prove, yorame solo…”
Ansi, una de mis amigas , myembro fidel i asiduo del Ihtiyarlar Yurdu serro su kaza despues la muerte de su marido i malgrado la insistensya de su ija, ijo i ermuera, de tomarla en sus kaza, eya prefero “arrekojerse” (komo dizia mi avuela) en lo ke era su segunda kaza en Hasköy
La mezma kayentor se ve tambyen en las otras ovras de muestra komunidad en la “Mischne Tora”, “Yetimlere Yardım Derneği,” “Golden-Age”,ets… ande todo es bazado sovre la amistad i la kerensya , ande “los ke dan” resiven sentimentalmente muncho mas ke lo ke ofresen.
Una verdadera komunidad es esto, el sentimyento ke avra syempre una persona ke vos kudiara en momentos de apreto, la boz amiga ke se oye kuando se responde a un golpe de telefon, la kara sonriente ke se enkontra en la kaye a la okazyon de un simple empleo, la invitasyon de vyejos amigos ke pensan a vozotros una noche de mued… este kudyo, esta kerensya ke dan un senso a la vida.
