Los Judios dalkavo de Yemen

Segun un artikolo ke meldi en el periodiko ‘The Economist’, los dalkavo judios de Yemen estan deshando el pais por entero, por modo de los aktos antisemites del governo i del puevlo de Yemen, i de sus komporto kontra el estado judio

Dora NİYEGO Judeo-Espanyol
25 Ağustos 2010 Çarşamba

Komo Yemen es un pais fondamentalisto, i ke no ay demokrasia en el pais, el puevlo de Yemen no tienen a uzansa de protester kontra kualsikera kondision del governo. Ma kuando la tansion puja en Gaza, u duspues de un akto teroristo de los palestinianos kontra el estado judio, los Yemenis salen a las kayes de San’a (la kapital del pais), para selebrar el asierto (basari) de los palestinianos. En la televizion, los Yemenis siempre meten komedias sovre palestinianos, burlandosen de bovos soldados israelianos.

Allado de este antisemitizmo, los yemenis dizen ke eyos apresian muncho la erensia de los judios en sus pais. En la grande mishkita en la vieja parte de San’a, los yemenis amostran a los  turistos kon orgolio, las ekskavasiones en las paredes echas por los judios artistos, i el valorozo arte judio. En el vilajio de Jibla, en el sur de San’a, los vilajieros les amostran la estreya de David en la vieja Sinagoga ke agora se transformo a una Mishkita. Los merkaderes de plata dizen ke sus platas son de grande valor porke son platas de la ley judia. La polisiya permete a los judios amerikanos de vijitar los karties viejos judios.

Ma de agora en delantre, no va aver mas karties judios en Yemen, porke duspues de mas de milanios en este pais, los judios dalkavo de Yemen estan prontos para salir del pais por entero. Sien anyos antes, 50.000 judios bivian en el pais kon la populasion de Yemen ke agora pujo a 23 miliones. La vida de los judios se izo mas difisil duspues de la fondasion del estado judio en el anyo 1948. Duspues de este anyo, aktos de violansia kontra los judios empeso a pujar en el pais. La majorita de los judios yemenis fueron salvados kon la Operasion del Tapet Majiko (Operation Magic Carpet), akomplido por İsrael i por los Estados Unidos. En el anyo 1990, 1200 judios yemenis fueron fuyidos del pais kon una segunda operasion. Duspues ke los rebeldos Houthi apresaron (ele gecirmek) el governo, el governo empeso a dezrepozar los judios mas muncho de antes. Sienes de judios fueron evakuados de San’a i embiyados a otros lugares.

Agora ke las menasas empesaron a pujar, grupos de israelianos, de judios amerikanos, i de diplomates, estan penando para establisir estos judios yemenis en los Estados Unidos i en el estado judio. La emigrasion de los judios dalkavo de Yemen va ser un grande evento historiko. Anyos antes, los judios de Yemen eran lo solos judios arabos ke tenian la libertad de tener una identidad araba i tambien judia. En Beirut, en Damaskus i en Bagdat, ande un tiempo egzistiya las mas grandes komunidades judias, agora lo ke kedo es solo unos kuantos judios ayedados. Ma los judios de Yemen puedieron prezervar sus Sinagogas i puedieron kontuniar a selebrar sus fiestas en estas Sinagogas kon grande liberdad por munchos anyos. Agora los dalkavo judios yemenis no tienen ke avrir una oja mueva, i empesar una vida mueva.