La muerte prematurea de Robert Abudaram, vice Prezidente de la komunidad Djudia de Turkia, aedado solo de 55 anyos, fue una grande pedrita para la kolektividad Sefardi i Ashkenaz de Estambol. Enerjiko, muy dinamiko, konsagrado desde su manseves a la aktividad komunal i karitativa, el fue anyos antes, el braso derecho del Prezidente de la komunidad de Kuzkuncuk, el Sinyor Albala de bendicha memorya.
A la muerte de Albala, el aksepto immedyatamente, sin ezitar, de asumir la responsabilidad de esta karga ke el kumplio kon grande kudyo i devosyon, syempre disponivle a ayudar kualkyer myembro ke se topava en estado de desmamparo en esta chika komunidad. En el anyo 1998, el fue nominado prezidente de la asosyasyon “Cemaatlar Masasi “ ke el dirijo kon grande komprensyon, esprito de ekidad ansi ke amor de la armonia entre los myembros.
I a partir de los primeros tyempos de muestro siglo, la alta funksyan de Vice-Prezidente del Konsilyo Laiko le fue konfiada, ke el kumplio kon la mizma fervor i el mizmo kudyo ke hueron syempre unas de las karakteristikas de su personalidad.
La muerte lo arranko prematureamente, kon krueldad, a su asensyon sosyal i profesyonal, al amor i a la kerensya de su famiya, de su madre, de su mujer i ijas ansi ke a la amistad de sus serkanos. A su mujer, su madre i sus dos ijas ansi ke a todos sus keridos, kolavoradores i serkanos, muestras kondolensas las mas sinseras i muestra profunda simpatia.
