Vyernes pasado, es kon emosyon i el mas profundo respekto ke fue rememorado (en el sementeryo Sefardi de Ulus) el rekuerdo de Rav David Asseo, Shefe Espiritual de muestra kolektividad durante lungos anyos .
Ombre de byen, savyo i de grande buendad, el fue syempre kudyozo de su komunidad sin nunka azer diferensya entre el riko i el prove.
Sus konsejos eran para mozotros todos, presyozos i de grande valor.
Estavan prezentes el Gran Rabbino İzak Hakeva i su konsorte, los myembros del Bedin, el Prezidente aktual de muestra komunidad Sami Herman ansi kel Prezidente onoraryo Bension Pinto i tambyen diferentes notavles de muestra komunidad.
Muestra simpatia profunda a sus dos ijas Sara Mizrahi i Fortune Aseo , a sus inyetos, ansi ke a todos sus serkanos. Ke su alma repoze en paz.
