Grasyas a la amabilidad de muestro amigo Charles Danon, tuve la alegria de tener entre mis manos, la edisyon espesyal de la revista franseza LE POİNT datada del mez de febrero 2008 enteramente konsagrada al “Pensamyento Djudyo” desde la epoka de Maimonides asta muestros dias.
Esta edisyon mos avla del adelantamyento perpetual i de la avyertura del verdadero Djudaizmo, de su Etika superyor i de su refleksyon profunda, ansi ke de todo lo ke El transmetyo a las otras relijyones i tambyen de todo lo ke el tomo de eyas.
A mi torno me syento el dever de partajar mi emosyon i mi plazer kon los lektores del ŞALOM ke puede ser no tuvyeron la okazyon de meldar los ermozos artikolos de la dicha revista.
En su prologo, Catherine Golliau, responsavle de la redaksyon de esta edisyon, dize: “Ke seriamos sin la Bibla, este livro de los Hebreos ke mantuvo el Kristyanizmo i el Islam? Le devemos ‘el interes por el Otro’.
İ eya kontinua: “Devemos muncho al pensamyento Djudyo, al de los orijenes i tambyen al ke evoluo en el korso de los siglos de galud, del egzilyo en Grenada, Fez, Safed, Praga, Berlin, Newyork i otros payizes.
Puevlo sin tyerra, los Djuıdyos konservaron sus espesifidad todo en imprenyandosen de las kulturas ajenas... Maimonides deve muncho al grande Muzulmano “Averroes” eminente komentador de Aristoteles, por kontra el selebre “St. Thomas d’Aquin” se inspiro del teksto del mizmo Maimonides.
Catherine Gollian mos dize tambyen kel mistisizmo oksidental se mantuvo del Zohar, de la Biblia i de los Kabbalistos, todo komo muncho mas tadre la filozofia rasyonalista topo sus fundamentos en Spinoza i se desvelopo kon Mozes Mendelsohn i Herman Cohen.
En el primer artikolo despues del prefasyo, Armand Abecassis dize: “Es ke egziste un pensamyento Djudyo? Eske Spinoza o Freud son pensadores djudyos porke nasyeron djudyos?
Komo distingir entre los pensadores djudyos i los Djudyos ke son pensadores?
Segun Abecassis: “Son pensadores djudyos: los ke se syenten apartenir al Djudaizmo de “Philon de Aleksandria” , de “Emmanuel Levinas”, “Moise Maimonides”, “el Maharal de Praga”, “Martin Buber”, i otros de la mizma sensibilidad.
Es a eyos ke devemos referarmos , es en sus eskritas ke devemos bushkar la repuesta a la kestyon.
Eyos pensan ke no abasta de simplemente ovedeser al ritual djudyo, ma ke kale estableser un dialogo kon la filozofia i la syensya.
Eyos mos mostran kel Djudaizmo kon sus tradisyones i su ritual, no es solo una reliyon popular i dogmatika. Eyos tomaron en konsiderasyon los koryentes filozofikos de la epoka ande bivyeron para ekspresar sus refleksyones. Por egzempyo Philon de Aleksandria en el primer siglo de la era Kristyana se refero a la Metoda alegorika de los pensadores estoisyanos para interpretar la Biblia ... Maimonides avlo kaji komo si era un disiplo de Aristoteles en su Ovra prinsipal “La Gia de los perpleksos” ets..
Syempre segun Armand Abecassis: Las diferentes “Kulturas” repozan sovre valores ke son propyas a kada una de entre eyas, i es sus enrikesimyento resiproko ke puede solo testiguar del “esprito” ke se topa en eyas.
Los sinko primeros livros de la Biblia afirman ke es a Abraham (Padre de la totalidad de la Humanidad) kel Mensaje i la Bendisyon de los Syelos son embiados, afin ke todas las famiyas del mundo los resivan.
El Talmud repeta kel Messiah vendra para la Humanidad entera i no por un solo puevlo...
Ay munchas otras verdades en este teksto de Armand Abecassis, grande pensador Djudyo kontemporeano, profundamente relijyozo todo en syendo avyerto al “Otro”, verdades ke dezeo komunikarvos, ma oy espesyalmente trespasi muncho el espasyo ke me es rezervado en esta pajina del Şalom.
