Istanbul kapitala kultural de la Evropa

Komo previsto, Shabat pasado Istanbul se instalo definitivamente (por un anyo)  en su rolo de “Kapitala kultural de la Evropa” ... diskorsos , konsertos, fuegos artifisyales, todo paresia sertifikar su glorya i su ermozura.

Metropola  ke yeva en su seno  vestijyos de tres grandes sivilizasyones: la Romana, la Bizantina i la Otomana  antes de devenir la sivdad la mas kosmopolita de la Turkia laika i demokratika, Istanbul kon su immensa varyedad , es tambyen un ponte jeografiko i kultural entre la Asia i la Evropa.

Segun lo ke mos ambezan las gazetas, Shabat pasado avia kaji 5000 personas kombidadas  para fyestar el grandiozo evento; entre eyas  Ministros de 20 payizes diferentes

En su diskorso, el Primer Ministro Turko Recep Erdoğan  insistyo partikularmente sovre la importansa de la historya i la influensa de muestra sivdad sovre la kultura Evropea. El disho: “Istanbul es una sivdad  Evropea en su Korason, su Kultura, su Sivilizasyon, su Pasado i su Futuro, una sivdad ke syempre torno su facha verso la Evropa, influenso su kultura i fue influensada por eya.

Munchas aktividades figuran en el programa de esta anyada kultural, entre otras: la avyertura  del “Masumiyet Müzesi” imajinado por el Premyo Nobel Orhan Pamuk, ansi ke la ekspozisyon “de Bizans asta Istanbul” ke fue prezentada en Paris entre Septembre i Novembre del anyo pasado.

 Ke esto sea el empesijo de una epoka de amistad i komprensyon mutual ansi ke de una kolavorasyon fekunda  i provechoza.