En esta ultima semana del anyo 2009...

Klara PERAHYA Judeo-Espanyol
30 Aralık 2009 Çarşamba

Ultima semana del anyo 2009, bilanso oskuro. Salvo ralos rayos de luz, las mizmas indjustisyas, la mizma indiferensya, la mizma promptitud a “refuzar el otro”, komo una ineksplikavle fatalidad sovre el ombre.

Es un poko en este estado de humor ke Vyernes la tadre tuve la oportunidad de ver el filmo “Avatar”,  kreasyon sinematografika ande lo “real” i lo “irreal” se mesklan i se responden el uno al otro, dialogo entre dos entitades diferentes, vizyones de la vida kontraryas las unas a las otras i portanto superpozadas en la imajinasyon del mizmo sineasto.

Aunke imajinaryo, el tema prinsipal de la historya mos toka de serka. La aksyon se situe en el futuro, en el anyo 2154. Un vyejo komandante de la armada amerikana nombrado “Miles Quatrich” kere invadir  i tomar debasho su kontrol “la planeta Pandora” ande bive el “trivo Na’vi”.

En este objetivo, un laboratoryo lavora debasho la prezidensya del Dr. Grace Augustine para aparejar un programa intitulado “avatar” (transformasyon), afin de trokar kriansas terrestres en personajes semblables a los sitizanos de la dicha planeta, lo ke permetra sus introduksyon entre eyos.

El personaje sentral de este konteksto irreal es un soldado gravemente ferrido  ke avia pedrido por syempre el uzaje de sus pyernas i tambyen  la total sensibilidad de la parte posteryor de su puerpo

Para el, este programa reprezentava la sola posivilidad de redevenir virtualmente un individuo normal en entrando en el puerpo de una kriansa  en posesyon de todas sus posibilidades i sensasyones , lo ke le permetra tambyen de  introduzirse fasilmente en el espasyo kovdisyado.

Una vez  sovre la planeta Pandora, el “heroe” se topo en un  entorno fabulozo kon sus “Flora” i “Fauna”  fantastikas, sus  animales enormes  bolando en los ayres a un tempo vertijinozo ansi ke sus personajes ekstra-humanos kon kola i largas orejas puntudas...  i entre eyos una mujer de una dulsor sovre-natural.

A un syerto momento, el tuvo un djesto de espanto delantre una de las bestyas bolantes, la mujer le disho entonses “no te espantes, no manifestes ni temor ni repulsyon i verras, eyas te ayudaran”...

Ansi nasyo entre los dos un profundo sentimyento de amor, el solo ke puede dar un senso verdadero a la egzistensya.

Ay en este filmo fantasgomeriko, una kritika del dezeo perpetual de los ombres de syempre dominar i konkistar sus derredor serkano komo leshano i en mizmo tyempo ay un mensaje ke mos ambeza la  inkomparavle importansa de la kerensya mutual.

En mizmo tyempo ke una teknika superyor, transandante i una ekstraordinarya rikeza de imajinasyon de la parte del sineasto, ay munchas otras kozas en este filmo ande kada espektador topa un poko de lo ke el bushka.