LAVORAR en ESTUDYANDO?

Coya DELEVİ Judeo-Espanyol
23 Aralık 2009 Çarşamba

O, estudyar en lavorando? El uno i el otro, vamos avlar de los dos estados del estudyante de Universidad. Es un sujeto muy ancho i siguro bastante difisil  para mi de analizarlo. Solamente lo ke puedo azer es una preva de ekspozar una vizyon superfisyal aprovechandome de mis observasyones personal, de artikolos  ke meldo i de lo ke syento. Ser posesor de un diploma de Universidad, konoser linguas etranyeras syempre fueron un grande “atout” para los mansevos. Ma, oy no esta bastante para topar un (buen) empyego. Los ke izyeron un “staj” myentres los anyos de estudyo estan mas avantajozos, tenyendo ansi una syerta eksperyensa ke les fasilita sus adaptasyon a la vida de lavoro.

Ay otro grupo tenyendo un diploma, ke estan kontinuando a meldar todo en lavorando. Estos keren arezyar sus karyeras kon una instruksyon suplementerya  komo azer “doktora” o “lisans superyor”. Es un prosesus kanseryozo i nesesita el apoyo i kompreansyon de los patrones o direktores diremos. D’otra parte ay komo una kontradiksyon. Porke en realidad munchos lugares no estan vyendo kon un ojo favoravle el personel ke esta estudyando. Los estan konsiderando, munchas vezes sin razon, komo elementos pasajeros. İ munchas vezes no les estan dando anchas posivilidades de lavorar. Al mansevo le kaye el dover de konvenser el patron i en vezes sus djenitores.

Me parese ke devo aklarar esta opinyon miya. Echad un ojo a syertas famiyas, komo ke diga?... ke engrandesen sus ijos “aryento de algodones” (en turko dizimos korumacı). Estos padres i madres sin kererlo, son komo un obstakolo delantre el dezeo de los mansevos ke keren bolar de sus propias alas. Naturalmente es de kerensya, ma esta kerensya “egzajerada” de los paryentes no ayuda muncho a la emansipasyon de los mansevos. Los djenitores, espesyalmente de situasyon buena, no pueden fasilmente konsever el menester de lavorar de sus ijos. En este paralelo, pensan o reselan tambien ke el lavoro puede influensar negativamente los estudyos. No tengo dingun komentaryo, porke kada kavzo es uniko en si mizmo i no es djusto de jeneralizar.

Siguro ke lavorar todo en estudyando en mizmo tyempo tyene sus enkonvenyentes. Por empesar, el mansevo no esta bivyendo yena, yena la vida de estudyo. Deve azer tambien sakrifisyos de sus oras de repozo i distraksyon. Vinyendo al staj ke, komo dishimos mas ariva es indispensavle aktualmente, ay de konsiderar i la otra facha del medayon. En jeneral en esta perioda, el stajyer no toma dinguna paga, komo tambien no tyene dinguna asiguransa sosyal.

Siguro ke esto es un dezavantaje importante para los ke no tyenen remedyos materyal sufizyentes i deven ganar unos, dos groshes para pueder kontinuar. Alora se estan ovligando a topar un echo, kualkyer echo, afuera de las oras de eskola i de staj. Lo mas difisil es para los mansevos ke vyenen a Estambol de sivdades de Anatolia para estudyar. En vezes es difisil de entender esta preferensya. Porke de muestros diyas en un grande shifro de sivdades de Turkiya ay grandes Universidades i institusyones de altos estudyos .

Malgrado esto, munchos tyenen el suenyo de meldar en Estambol. Deke Estambol? Seriya la vida briyante de la Metropol, el movimiento kontinual de esta grande sivdad o la fama de sus Universidades ke los trava malgrado las difikultades? No se. Kon sus propias palavras, meteremos el punto final a este teksto:“En Estambol tomar reflo afilu esta kon paras. Aki, el grande reselo muestro, de los estudyantes es el mantenimiento...”