El milagro de un esforso

“Transmeter”, “Luchar”, “Dar”....

“Dar de su tyempo, de su kerensya” es puede ser lo ke de mozotros, va solo  kedar

Klara PERAHYA Judeo-Espanyol
23 Aralık 2009 Çarşamba

Myerkoles la noche  en la sala de komer del Barınyurt ke tyene, oy en dia, la aparensya de una ermoza sala de grande otel , kon su riko ekleraje, sus tablos sovre las paredes, las mezas perfektamente adornadas, kon sus  pensyonaryos mesklados a los myembros del komite dirijente ansi ke a los envitados, en una atmosfera de festividad i de grande intimidad , tuve personalmente la impresyon de toparme al seno de una reunyon familyal.

Mas de 20 anyos antes, un grupo de mujeres i ombres  se avian esforsado de asegurar una vida dinya a ermanos i ermanas de diferentes edades ke se topavan en  el desmamparo i el dezespero... poko a poko otras personas se adjuntaron al primer grupo, tomaron  sovre eyas, gradualmente, la  karga sakra... i ansi  kontinuo el lavoro, kon la mizma ardor, syempre en una atmosfera de  sinsera kolavorasyon bazada sovre la amistad i la kerensya resiproka.

 Myerkoles la noche  se puede afirmar ke todo era un plazer para los ojos, el paladar, i  sovre todo para el korason,  las dos somptuozas Hanukiyas kon sus kandelas ke fueron asendidas  kon kantes rituelikos... mas tadre  las romansas de muestros avuelos kantadas kon karinyo i nostaljia por un mansevo muy simpatiko,  la ermoza loteria  prezentada kon muncho hen, el pasto eksepsyonal del pishkado kocho al orno sovre  un chiko monton de aroz, la atmosfera jeneral  echa de alegria i de rizas ....i,  lo ke a mi parese era lo mas  sinyifikativo “la maraviyoza ekspresyon de kontentes i de konfiansa ke arrelumbrava la kara de los pensyonaryos”.

 Myerkoles la noche no mos topavamos en un azilyo, mos topavamos en una kaza... En el Barınyurt no ay de una parte “pensyonaryos” i de la otra partre “dirijentes”, en el Barınyurt ay una grande famiya  kon todo lo ke esta palavra kontyene de  kayentor afektiva.

 Se komyo, se kanto i se baylo endjuntos ... sovre la pista de dans, los myembros del aktual komite endjuntos kon varios pensyonaryos... el Prezidente Selim Nahmias kon Raşelika, Miryam o Tuna, la prezidente de las damas Eti Tastasa kon Beto, Yusuf  o Avramiko...  

Myerkoles la noche, el 16 del mez de desembre 2009, un vyejo sonyo  se realizo de una manera mirakuloza.