El desrepozo de Shimon Peres
Hospitalizado Shabat la noche por un dezmayo ke turo pokos segundos, Shimon Perez, prezidente del Estado Israelyano, pudo tornar a su kaza el dia sigente, despues profundas investigasyones medikales ke afirmaron el buen estado de su salud.
Su desrepozo fue kavzado por un ekseso de kanserya a la sigida de un largo periodo de lavoro sin interrupsyon.
Le oguramos salud buena i prezensya permanente a la kavesa del Estado Israelyano
El premyo “Leon de Oro” atribuido a un sineasto Israelyano
Samuel Maoz, sineasto Israelyano, resivyo el prestijyozo premyo sinematografiko nombrado “Leon de Oro”, el kual es atribuido al mijor filmo prezentado en el selebre Festival de Venezya. El titolo del filmo es “Lebanon” i konta la primera gerra de Israel kon su vezino, ansi ke todas sus sufriensas i los tromatizmos ke desharon los dolorozos kombates. En resivyendo el premyo, Samuel Maoz disho ke el lo partaja kon todos los ke pudyeron tornar bivos de esta terrivle lucha.
Pranso de Iftar en la Büyük Ada
Un ermozo pranso de “Iftar” fue organizado en el Sentro Kultural de la Sinagoga de Büyük Ada, por el komite de esta Asosyasyon, en honor de los dirijentes munisipales i de los permanentes de la Isla, todos prezentes en una atmosfera de mutual byen kerensya.
Estas reunyones provan las relasyones de solidaridad i de simpatia ke egzisten entre todos los moradores permanentes i intermitentes de la Isla i renforsan ainda mas el sentimyento de amistad ke ata los unos a los otros.
