Anyos antes un savyo avia dicho:
Lo ke aparta el ombre de la haya, no es solo la intelijensya, ma tambyen la fakultad de esperar.
En unos kuantos dias “Rosh Ashana”. A kada prinsipyo de muevo anyo, tenemos el sentimyente (produkto de muestra eternal esperansa) ke las kozas trokaran … ke muevas perspektivas surjiran al orizente i ke muevos kaminos se avriran …
A kada prinsipyo de anyo, pronunsyamos los mizmos dezeos i las mizmas suplikas, kon syempre el mizmo dubyo en el korason … Eske van a ser realizados ?… Sea lo ke sea , los pronunsyaremos kon o sin sertitud… los pronunsyaremos para ke el espasyo ke mos entorna no kede silensyozo, vazio de palavras umanas.
Por empesar :
“Salud i alegria”,
“Paz en el mundo, paz en los korasones”.
“Sezo en muestro pensamyento.,
“Ekidad i objetividad en muestros djuzgamyentos”.
“Kerensya i amistad en muestra mirada,
i tambyen:
“Konsensya de muestros derechos i de los de los otros’,
‘Konfiansa en un futuro mas djusto i mijor entendido’,
‘Syempre Fey en una fuersa superyor, uniko refujyo del ombre’.
En una de mis eskritas pasadas, avia notado la refleksyon sigyente : ‘La vida mos ensenya ke ay valores al pareser chikas, ma en realidad muy importantes, las kualas mos mostran munchas vezes el kamino a segir en momentos de desmamparo’.
I komo Marc Aurel, deziremos:”Sinyor,dame la trankilidad de esprito de akseptar lo ke no puedo trokar, la fuersa para trokar lo ke se puede trokar, i la saveduria para apartar el uno del otro’.”
