El koro de Thessaloniki en el dia Evropeo de la Kultura Djudia

Şeli GAON Judeo-Espanyol
9 Eylül 2009 Çarşamba

Vyernes ultimo mos fuimos kon Dora Niyego i Sevim Kohen; a aresivir un grupo de kuarenta personas; vinyendo de Thessalonik por asistir al dia evropeo de la kultura djudia. En el momento ke arrivi al otel; vide un grupo en el lobi avlando en grego. Me presenti i de vista una kayentor (sıcaklık) nasyo entre mozotros.

Komo de grupo; de edades diferentes, de trenta anyos fina ochenta, mujeres, ombres, mansevos i mansevas, uno mas sempatiko de otro; avlando kuatro sinko linguas, komo el djudeo-espanyol, el grego, el ingles, el franse i el ebreo.

Del momento ke mos konosimos; nasyo una intimidad, una kerensya i ampesimos a avlar. Me presentaron kon el presidente del grupo sinyor Alberto Sevi, el maestro del koro de ventisinko personas, i el pianisto mansevo.

Kuando los otobuses estavan prontos, tomimos kamino todos endjuntos para iyirmos a Barınyurt; a komer por noche de Shabat. Se enteresaron muncho de los vyejos i el edifisyo de Barınyurt les plazyo muncho.

En la tarasa las mezas ordenadas kon muncha atansyon (itina), la vista maraviyoza del Bosphor kon los servidores limpyos kon karas riyentes era koza de ver!...

Despues del kidush i del amotsi mos asentimos a komer. Se tresalyeron del komer savrozo, i disheron ke es el komer el mas savrozo de las komidas djudias ke komyeron fina oy.

Komo la sinyora Frida Matalon tuvo sus 78 anyos akel dia, le fyestimos kon un gato de kastanyas, su aniversaryo i eya estuvo muy kontente.

El 6 Septembre alhad demanyana, los yevimos a la sinagoga Ashkenaz para ke agan una prova del koro.

Los ke no eran del koro, se fueron a Neve-Shalom por asistir a una boda ke aviya.

El Koro de la komunitad djudia de Thessaloniki se fondyo en el anyo 1995 de la parte de los djudios de Thessaloniki.  En sus repertuares, la grande partida de las  kantikas es en Ladino, i a parte kantikas en ebreo i en grego.

Eyos asistyeron a munchas aktivitades (etkinlik), en paises diferentes. En la dirijensya del maestro Kostis Papazoglu ay en este koro; 14 sopranos, 7 altos, 4 tenores i 5 bases.

El sinyor Kostis Papazoglu fondyo este koro, para pueder kontinuar  a azer bivir las kantikas sefarades.

Keridos lektores; kaliya ver la djentorya de la sinagoga Ashkenaz a las dos i medya. La djente final treser etaj, i munchos kedaron en pyez.

Kuando el presidente de muestra komunitad vino, el presidente Alberto Sevi izo una chika avla para remersyar i envito al presidente Silvyo Ovadya para transmeterle un rekuerdo.

Todas las kantikas fueron aplodisadas en pyez kon los gritos “bravo bravo” de los partisipantes. Tanta djentorya ke despues de sej, syete kantikas, los dirijentes fueron ovligados de vazyar la sinagoga, para pueder tomar a los ke estavan afuera.

Dunke; el koro kanto mas de una ora, en dos vezes para ke todos profiten de esta ermozura.

Aviya munchas aktivitades en este dia de kultura komo; ekspozisyones de Hanukiyas, de estatuas (heykel) de Nadia Arditi, de la imprimeria djudia (matbaa), konferensyas; una de eyas kon tres profesores i el eskrivano Mario Levi, el sujeto era: “La kultura de bivir endjuntos”, muy enteresante.

Aviya koros, konseres, i otras aktivitades ke se organizo kon muncho esforso. El koro de Cako Taragano, kompozado de 8 ombres i 7 mujeres i el grupo de instrumento de muzika (saz), estan interpretendo (icra etmek) los kantes divinos (ilahi) de las Sinagogas de los djudios Sefarades.

A la fin asistimos al konser de “Los Paşaros Sefaradis”; ke son un grupo konosido no solo en muestra komunitad, ma en el mundo entero.

Eyos estan djugando un rolo muy emportante, kon las investigasyones (araştırma) i las kompozisyones muzikal (beste), ke estan azyendo enriva de las kantikas djudeo-espanyol del puevlo. Kon esto; estan azyendo bivir la kultura Turka-Sefarad.

Verso la fin, los myembros del koro Thessaloniki, partisiparon a Los Paşaros Sefaradis, i endjuntos kantaron en azyendo dos tres bozes.

Veramente fue muy reushido i muy sentimental de ver todos kantando, yorando i dando palmas tanta djentorya...

Nasyo una kerensya, una amistad internasyonal entre mozotros. Kon la kolaborasyon de los dos paises, se formo las relasyones de ermandad. Pasimos una fin de semana inolvidavle. Tanto mos atimos los unos kon los otros ke; a la ora de la espartisyon mis ojos se incheron de lagrimas (gözyaşı).

Penso ke kale felisitar a todos ke se okuparon para pueder organizar este dia kon tanto detalyo, i tanto esforso.

Al anyo vinidero mijorado...