Komo munchos ya lo savesh, yo vo muncho a Turkia i sovre todo a mi sivdad natal de Izmir, “mi kaza” ande tengo dainda muncha famiya, amigas, i konosidos. Uno de los mas inolvidables viajes fue el ke ize kon mi marido en el enverano de 1992, en una manera de onorar el pais ke aresvyo los Djudios egzilados de Espanya 500 anyos antes. Izimos el tur del sud i oeste del pais en un oto alkilado, i vinimos a Izmir a tiempo de fiestar Rosh-ashana kon mis keridos ayi.
Estuvimos la primera noche kon famiya departe de mi papa, i la sigunda kon la parte de mi mama. Ke plazer fue estar kon eyos a esta okazion! En en la meza no mankavan las komidas simbolikas para la seremoniya de “los yirasones” (“yehiratsones”), ke empesa despues del kidush. (Este nombre viene de los primeros biervos de las berahot, “Yehi ratson lefaneha…” en ebreo, ke en ladino es “Sea voluntad delantre de ti…” Es una tradision bazada en el Talmud, ande las berahot djugan kon el sonido del biervo en ebreo de lo ke se va komer. Es un sujeto ke merese otro artikolo.) Avia la “mansanada” (komposto de mansanas, o dulse de mansana) ke reprezenta el dezeo de tener todo dulse en el anyo muevo. Se disho los “yirasones” tambien kon el prasifuchi (fritada de prasa), fritada de kalavasa, i de pazi o espinaka, i fijones gizados. El pishkado kon kavesa, para ke seygamos “siempre de la kavesera, i no de la kola”, la agranada para abondansya, i mas. Algunos lo yaman esta seremonia el “Seder de Rosh-Ashana.” Los Ashkenazim no tienen este uzo deltodo!
El primer dia, mi marido i yo asistimos a las tefilot en la keila (el kal) Bet Israel, ande mos aviamos kazado en 1960, i ande ivan mi papa i todos los ombres de la famiya. (Es dainda la mas grande i elegante keila en Izmir aunke los Djudios mas ya no moran por este kartier.) En la azara de mujeres ariva estava sola yo, djuntos kon mis rekuerdos i el plazer de sintir las orasiones en ebreo i ladino kon “makames” a la turka. En este ambiente tan familiar, miri kon ojos de vijitadora los detalyos unikos del ermozo sanktuaryo: el enorme kandelario de kristal, los mobles, las puertas, i sovre todo la teva, de akaju lavrada artistikamente, las dekorasiones endoradas en las paredes, el tavan, i en la kupula, los vitrales kon el siyon (estreya de Magen David), los enormes kandelabras kon luna i estreya (simbolo de Turkiya) enmedyo, i las almenaras de bronze briyando. La teva, en dos partes a kada lado del ehal, esta situada por la pared del sud (no por el este, komo se uza en la Amerika.) Mirava tambien los jestos de los ombres en saludandosen de parte a parte, ke me izo akodrar de mi papa, de bendicha memorya. Ests emosiones de akel dia vinieron a sus mas alto punto en sintiendo los sonos divinos del shofar en esta “keila muestra” otruna ves.
Munchas vezes ya fui a Turkia desde entonses, ma en mi memorya, el kinsentenaryo de los Sefaradis en Turkiya va ser siempre atado kon esta eksperiensa esmoviente de Rosh-ashana en Izmir. A la okazion de los santos dias ke se estan aserkando agora, vos oguro a todos una anyada mueva buena i alegre, kon salud i paz. Tizku Leshanim Rabot.
Rachel AMADO BORTNICK
