Fueron nombrozos los ke, vyernes demanyana, se topavan en el Semiteryo Ashkenaz de Ulus, para konmemorar el rekuerdo de los Yahidim ke (ay de esto 23 anyos) fueron kruelmente matados en estado de orasyon.
La emosyon era grande, la amargura tambyen. Una kandela personal fue asendida en memorya de kada una de las viktimas ... El Kadish fue dicho kon fervor i tristeza ...un diskorso, muy esmovyente en su simplisidad, fue pronunsyado por un mansevo. Ay eventos ke nunka dezapareseran de muestros rekuerdos.
La asistensya era nombroza, enkavesada por el Gran Rabbino Rav Isak Haleva i kaji todos los myembros del Kolejyo Rabbiniko de muestro payis. Eran prezentes: Las famiyas de las viktimas, el Konsul de Israel Moshe Kamhi, el prezidente de muestra Komunidad Silvyo Ovadya, del Neve Şalom Vakfı Jojo Nasi, de la F.K.D. Seyfi İşman ansi ke los prezidentes de todas las Asosyasyones sosyales i karitativas i tambyem numerozos notavles de muestra kolektividad.
Kel rekuerdo de todos los ke pyedreron indjustamente la vida en este terrivle krimen sea syempre prezente en muestra memorya en sinyo de respekto i tambyen de vijilansya i ke sus almas repozen en paz.
