TUDELA O TOLEDO

Judeo-Espanyol
19 Ağustos 2009 Çarşamba

La sivdad de Tudela en Espanya se topa en la rejion de Navarre en el nordeste del pais, i Toledo se topa en Andalusia en el sud.  Leshos uno de otro.

Ma los nombres se paresen, i por esto  en la istoria Judia ay un poko de konfuzion entre los dos nombres. Por egzemplo, en algunos livros i artikolos eskrive  ke el savio i poeta grande Yehuda Halevi (s.1075–1141) nasio en Toledo, i en otros dizen ke nasyo en Tudela.  Mezmo se topa en Tudela  una “plazuela” a su nombre (komo en Coroba ay una al nombre del Rambam - Rav Moshe BarMaimon, o Maimonides.) De mizma manera, por el Rav Abraham Ibn Ezra (1092 o 1093–1167), eskriven a vezes  ke el nasyo en Tudela, I a vezes  en Toledo.  Ibn Ezra, o Abenezra,  era un poeta, gramatiko,  matematiko, I astronomo, I mezmo ay un krater a su nombre en la luna (Abenezra crater.)

Siguro ke kada uno de estos dos lugares mos azen akodrar de personas famozas en la estoria Sefaradi. 

Tudela era la mas vieja i mas emportante komunidad djudia del viejo reynado de Navarre.  Es el lugar de nasimiento del mas famozo viajador medieval de Evropa, Binyamin de Tudela. El salyo de su sivdad en 1164 i viajo en Evropa, Asia I Afrika, I eskrivyo lo ke vido.  El viajo asta el oriente leshano sien anyos antes de Marko Polo! Shem-Tov ben Isaac Shaprut era  filosofo, mediko, I polemisto,  ke nasio  en Tudela verso la metad del siglo katorze (no tiene relasion kon el famozo Hasdai Ibn Shaprut, ke se korespondyo kon el rey de los Hazares en los anyos de 900); El famozo kabalisto Abraham Abulafia, aun ke nasio en  Saragosa (1240), se engrandesio I paso su juventud en Tudela. Uvo tambien munchos otros rabinos ke eskrivieron ovras de relijion. 

Por Toledo, sivdad ke fue komo el korason del Judaismo espanyol, dizen ke el nombre viene del ebreo “Toledot”, jenerasiones.  En la Eskola de Traduktores en Toledo  se tradusio ovras del arabe al ebreo, latin, I kasteyano. Entre poetas I filozofos Judios ke eskrivieron sus ovras en arabe en Toledo, estan Yehuda ha-Levi i  Abraham ibn Ezra, mensionados ariva.  Yehuda Al-Harizi - rabino, traduktor, poeta, i viajador (nasio en Toledo en 1165, murio en Aleppo en 1225) tambien traduizo el Moreh Nevuhim (Giya para los konfundidos) del Rambam del arabe al ebreo. Yehuda Moshe Kohen, Abraham de Toledo, i Samuel haLevi Abulafia traduizieron ovras de astronomia del arabe al espanyol. (Los Abulafias eran entre las famiyas famozas de Toledo del siglo 13.) Samuel ha-Levi Abulafia (s.1320-1360), trezorero i konsejor del rey Pedro I, fue el primer Judio de yegar a un posto tan alto en un reynado Kristiano.  El konstruyo unas kuantas sinagogas, entre eyas la sinagoga “El Transito” es la mas grande I se puede vijitar dainda komo un museo Judio. La otra sinagoga ke se ve en Toledo (despues de la ekspulsion se izo la kilisia de Santa Maria la Blanca) era konstruida por Joseph ben Meir ben Shoshan ke era el ministro de finansia del rey Alfonso VIII de Kastilya. I no vos olvidesh de la leyenda de  este rey ke se namoro de una Judia de Toledo ke se yamava Rachel!

Rachel AMADO BORTNICK