El Sinken Livro de la Torah traduziso en lengua Turka
Komo vos fue anunsyado en el “Şalom” de la semana pasada, debasho el titolo “Devarim Türkçe’ye çevrildi”, la traduksyon i publikasyon del Sinken Livro de la Torah, el kual rezume la esensya mizmo de la Ley Hebraika, se topa pronto (en el Gözlem Kitabevi) a enrikesermos kulturalmente i moralmente.
Esta ermoza prestasyon fue realizada por un grupo de intelektuales debasho la direksyon de Ester Asa. Todas muestras felisitasyones i la ekspresyon de muestra sinsera gratitud a Ester Asa i su grupo ke mos dan ansi akseso a la total komprensyon de un trezoro del patrimonyo kultural djudyo.
Triste akontesimyento en un sentro homoseksual de Tel-Aviv
Şabat la noche un ombre vestido de preto, la kara maskada, penetro subitamente en un sentro de “homoseksuales i lesbyenes” de Tel Aviv, mato dos mansevos i firyo munchos otros, antes de fuir sin ser rekonosido.
El akto kriminal fue immedyatamente sanksyonado moralmente por los dos Shefes del Estado Israelyano Şimon Perez i Benyamin Natanyahu ke lo kondenaron fuertemente i afirmaron ke Israel es un payis demokratiko ande varias tendensyas pueden ser manifestadas todo el tyempo ke eyas no danyan la seguridad ni empiden la libertad de los otros konsivdadinos.
La Polisia ke esta syempre a la bushkida del asesino, deklaro ke al pareser no se trata de un akto de odyo o reprobasyon, ma de sola inimistad personal.
El Ministro Israelyano de los Echos Eksteryores debasho una grave inkulpasyon
Segun la prensa Israelyana, Avigdo Lieberman, Ministro de los Echos Eksteryores de Israel se topa aktualmente debasho la inkulpasyon de la Polisia de su payis, por abuzo i emblakesimyento de moneda, a su profito personal ansi ke al profito de su partido.
El kavzo fue transferado a la Djustisya Israelyana.
A:Liberman deklaro ke en kavzo de konfirmasyon de la parte del dicho Ministeryo , el esta pronto a demisyonar de su posto.
