Ombre de grande sagasidad i syensya Biblika, ansi ke de grande komprensyon humana, Rav David Asseo Shefe espiritual de la kolektividad djudia de Turkia desho detras de el, ay de esto syete anyos, el rekuerdo de un ombre de ley ke konsagro toda su vida a la paz, el byenestar de su komunidad i a una fidelidad irreduktivle al payis ke resivyo muestros avuelos leshanos antes 5 siglos.
El tenia el uzo de dezir “kale dar, absolutamente dar ...dar a kada uno segun sus menesteres” , palavras ke konfirman su profunda sensibilidad delantre la sufriensa i las inegualidades sosyales.
Ke su alma repoze en paz, en la beatitud ke prokura el dever byen kumplido.
Su memorya sera evokada el 27 del mez koryente en la profunda espiritualidad del Kaddish pronunsyado kada anyo a semejante data.
