Eskapi oy de meldar el livro titulado *Un Ramo de Poemas* eskrito por HaimVitali Sadacca.
Ay sinkuenta i sesh poemas en el livro ke son gias ekselentes para la djente.
Estos poemas inkluyen diversos mesajes para dirijir la umanidad a una vida mijor sin emosyones negativas del odio, del selo i del orgulyo.
En “Miradas Diferentes” deskuvrimos ke el buto del poeta es distribuir sonrizas entre la djente.
En la mayor parte de los poemas, vemos ke la vida de diversa djente es yena de etapas de la infelisidad. Ma entendemos ke puedemos venser el pesimismo kon la sonriza i pensamientos pozitivos. En el poema “El Selo” entendemos la negatividad de ser selozos, porke kada ser umano tiene varias kalidades. Uno no deve ser selozo de otros, porke esto danya su alma i puerpo.
Un otro poema, “Un Mundo Salvaje” narra la violensia i el rasismo en el mundo, diskutiendo la importansia de la paz para la felisidad de toda la djente.
Ma lo mas me plazio el poema “Letra a un Nuevo Nasido”, komo ensenya a kombatir kontro difikultades de la vida i avla de la importansia de la paz para toda la umanidad.
Indemas, mos sugjiere de ser optimista entre difikultades. I el poeta aksentuya la importansia de la famiya en “La Kaza de Viejos”, i avla de la tristeza de una mujer aedada ke se eskarinya de sus kreaturas.
El poeta indika la dualidad en la vida en “La Suerte de la Persona” i ‘’El Riko i el Prove’. Dinguno eskoje a su famiya antes de venir al mundo sin ser orgolyozo o repunyante.
Otro poema “La Mujer Pesimista” aksentuya ke la vida vale la pena de bivir. Uno puede ser feliz para el lavoro ke el aze en su vida, malgrado su soledad.
Kuanto a los poemas “Un Marido en Dezespero”, “Dezrepozo de Mi Ijo” i “La Operasyon”, estos aksentuyan la unidad de la famiya en difikultades. “El Peshkador” es sovre las difikultades de la vida para un ombre ke tiene kreaturas i una mujer.
En el livro puedemos enkontrar el pesimismo i el optimismo djuntos, kon poemas ke narran diversos periodos de la vida de seres umanos. Los poemas son sovre la vida umana i dan lesyones agradavles sovre la vida familyala.
En kurto, el livro entero es una buena gia para kada ser umano.
Derya AGİS
