La vida de Micheal Jackson fue yena de kontradiksiones. Mezmo su relasion kon los judios i kon la komunidad judia fue yena de kontradiksiones.
En el anyo 1993, un anyo antes de la inogurasion del Muzeo de la Tolerensia i la Ekspozision del Holokosto, Jackson dezeyo de vijitar este muzeo. El fondator del Sentro Wiesenthal i del Muzeo, Rabino Marvin Hier izo el torno del muzeo kon Jackson durante dos oras enteras.
Kuando salyo del muzeo, Micheal estava yorando i el disho ke estuvo yorando por dos semanas. Ma, segun el rabino, dos anyos duspues de este evenemiento, Jackson publiko un album kon la kantika ‘Eyos no se okupan de mozotros’ i ajuto una nota al album dizyendo ‘Yo judio? Todos me estan arondjando’.
El rabeno Hier le eskrivio a Jackson una letra muy inyervoza. En su repuesta, Jackson se estuvo ekskuzando, i le prometio al rabeno, ke el va meter una nota eksplikatora en sus futures albumes, dizyendo ke el es de la parte de la pas, de la tolerensia, i del amor.
En el anyo 1999, Jackson rankontro un otro rabeno, Shmuley Boteach. Los dos se izyeron amigos, i empesaron a lavorar endjuntos por la kampanya: ‘Ameliorar las Kreaturas’.
Diya de Lunes, Boteach telefono los gazeteros, kontando su buena relasion kon Jackson. Jackson los akompanyava munchas vezes en las komidas de Shabat, disho Boteach. Una vez Jackson le disho ke el kere konoserlo al Primer Ministro Ariel Sharon. Sus menajeres lo aviyan konsejado de no vijitarlo a Sharon porke esta vijita puede ofender sus fanes, ma Jackson no los oyo, i se fue a toparse kon Sharon.
‘Los ke dizen ke Jackson no era amigo de la komunidad judiya, se estan yerrando’ esta dizyendo Boteach. ‘Jackson teniya un korason yeno de buendad i de ermozura’. Boteach esta dizyendo ke el esta esperando ke la muerte de Jackson no seyga en vaziyo, i ke su muerte seyga una buena lisyon por los selebres, ke eyos entiendan las valores de la famiya, i ke no seygan vendikto (yenilmek) por la toksina de la selebridad. ‘Jackson siempre tuvo menester de una koneksion kon el Dio, kon la spiritualidad, i kon la famiya’ esta dizyendo Boteach. ‘El era un testigo de Yehova, i por esta razon, kuando el fue ekspulzado de la eglizya, todos sus problemas empesaron’.
El diya ke Jackson salyo del Judiko ande el fue akuzado de abuzo de seksual infantil, el estuvo saludando sus fanes. Kuando esta foto fue publikada, todos remarkaron un ilo kolorado en su puso siedro. Este ilo es un sinyo de los selebres ke se van a ambezar la Kabala.
La madre de los dos ijos de Jackson siendo judia, los ijos de Jackson son konsiderados komo judios segun la ley judia. Ma, el Tibunal Superior en Los Anjeles desido de dar la tutela (vasiyet) de todos sus tres ijos a la madre de Jackson. Ma, dainda no se save si la madre judia de las dos kreaturas va objektar a esta desizion.
La muerte de Jackson no es solo una terible trajedia por sus tres ijos ke kedaron uerfanos, ma el mas dolorozo aspekto de esta trajedia es ke, todos kedaron espektatores a la dekadensia de Jackson, i no izieron nada para evitarla.
