La Kehila de Burgaz rika de un muevo Sefer Torah
La sinagoga de la Isla Burgaz tan presyoza para sus rezidyentes estivales i tanto provechoza para la edukasyon relijyoza de los ninyos, se enrikesyo de un muevo Sefer Torah, ofresido por 15 famias.
Ke este sakro simbolo del Judaizmo akompanye syempre fyestas i alegria i sea la ekspresyon de una fidelidad irreduktible a muestra fey.
El “Türk Hava Yolları” konfio su “katering Kasher” a la Matan Baseter
Despues de largas entrevistas, la kompanyia Aeryana “Türk Hava Yolları” konfio el servisyo de su gizado Kasher a la Matan Baseter.
Ansi, de ke payis ke sean, praktikantes relijyozos djudyos puedran gostar al gizado tan pastozo de la kozina kasher de Turkia, echa debasho la estrikta vijilansya Rabbinika.
Ke syempre vaya adelantre , este tan presyozo servisyo kulinaryo ke tyene el doble merito de responder a una preskripsyon relijyoza Djudia muy importante, i tambyen asegurar una vida alegre i dinya a muestros korelijyonaryos menesterozos.
Bodas i alegria en la Sinagoga Neve Şalom
Doz bodas Alhad el 5/7/2009 en la Sinagoga Neve Şalom komo syempre adornada de flores i de karas sonrientes.
En una atmosfera de konvivyalidad i de dulse emosyon.
Suzan Nogay & Cem Margunato
i
Hayat Uyanık & Ceki İşletme
adjuntaron sus destinos en el entuzyazmo de sus amor resiproko, los ojos briyando de kontentez, tornados verso el futuro.
Ke syempre ayga Paz, Kerensya i Prosperida en sus unyon.
Muestras sinseras felisitasyones a las famiyas “Nogay – Margunato” i “Uyanık – İşletme”.
