En estos dias de reminisensya

Es ke un dia se puedra enteramente perdonar? “ Mis ijos? puede ser... Yo personalmente? no kreo... En todo kavzo, nunka a Heidegger...”

Vladimir Jankelevich

Klara PERAHYA Judeo-Espanyol
14 Nisan 2010 Çarşamba

Lunes, el 12 del mez koryente, komemorimos komo kada anyo, no solo kon tristeza ma tambyen kon un sentimyento de revolta irrezistivle, el rekuerdo de ninyos, mansevos, ombres i mujeres mortalmente feridos en sus vida, sus proyektos i sus lucha de kada dia, todos salvajemente eksterminados por razones inyovles i byen entendido inkomprensivles....

Syempre, en el esprito de munchos de entre mozotros, kedara la amargura i tambyen, lo ke es por seguro mas grave, una eternal pregunta “deke?”

Deke un puevlo sivilizado, de un alto nivel kultural i artistiko, humanisto en su filozofia, kamino los ojos serrados (sin kaji ninguna rezistensya) detras  de una teoria no solo inhumana ma absurda?

Deke los syelos i el entorno amigo (serkano komo leshano) kedaron  kayados? Deke el Papa de la epoka (shefe espiritual de mas de una milyarda de  Kristyanos) no yamo sus fideles a la lucha kontra el mal absoluto, prinsipal objetivo de todo modo de ensenyansa relijyoza?

Es ke avia para eyos una razon mayor, mas fuerte ke la boz de sus dever moral? o byen es ke fue por indiferensya i oportunizmo, kada uno enterrado en su eternal egosentrizmo?

De otra parte, es ke el fakto de echar bombas sovre el kamino ferrovyero ke ayegava a Auschwitz puedia impedir la muerte de munchos de muestros ermanos? Es ke se pudiya realmente intervenir para salvar algunas de las viktimas? Ninguno puede responder kon presizyon a estas kestyones. Ma a lo menos esto iva ser  un poko de luz en las tinyevlas ande estava undido el djudaizmo de akeya epoka.

Aktualmente, despues kaji 65 anyos,  topamos estas kestyones  un poko en kada lugar, en la Prensa, los debates  de la Televizyon o las simples reunyones entre amigos. Kestyones  persistyentes, komo un obsesyon ke va syempre persigir no solo el puevlo djudyo ma tambyen la konsensya humana en su totalidad.

I fatalmente  mos demandamos: “Es ke se puedra un dia perdonar? Ay de esto unos kuantos anyos, a una semejante pregunta, el grande pensador djudyo Vladimir Jankelevitch avia respondido  “Mis ijos? puede ser... Yo personalmente? no kreo... En todo kavzo nunka a Heidegger...”

Djustamente la grande amenaza se topa aya, “en la falta  de verdadero humanizmo” ke se ve envezes en la klasa pensante, en los dirijentes espirituales i relijyozos kuala sea sus fey...