Kronolojikamente;
Djuevez el 18 del mez de Marso 2010 Simone Veil, reskapada del kampo de la muerte de Auschwitz-Birkenau, fue konsagrada myembro de una de las mas gloryozas İnstitusyones mundyales “La Akademia Franseza” kompuesta de 41 myembros renovados unikamente en kavzo de muerte de uno de entre eyos.
Simone Veil no fue admetida en este espasyo grandiozo por la sola kualidad de su lavoro literaryo, ma partikularmente por su personalidad i su enkaminamyento en el kampo sosyo/etiko...
Eya fue resivida por su lucha para salvar del olvido i de la indiferensya el rekuerdo terrivle de la Shoa, afin ke nunka, en ningun lugar del globo terreste, no se repete semejante akto de inhumanidad… tambyen por su kombate en favor de la emansipasyon de la kondisyon feminina i la posivilidad de dar a la mujer los mizmos derechos i la mizma otonomia ke su kompanyero… Eya salvo de la muerte una multitud de mansevas en instorando durante el periodo de su mandato de Ministra de la Salud, el derecho para kada mujer de interrumpir de la manera la mas ijyenika posivle un prenyado inoportuno.
Eya enfin sovrepaso el odyo i el esprito de vengansa para ovrar (unos kuantos anyos despues de la gerra) a la kreasyon de la Unyon Evropea de la kuala las dos vyejas enemigas ‘la Fransya’ i ‘la Almanya’ devinyeron los prinsipales pilares…
En su diskorso de ‘Byenvenida’, el briyante eskritor Fransez Jean d’Ormeson disho: En adresandome a vos, en esta sirkunstansa, penso kon emosyon a todos los ke konosyeron los kampos de eksterminasyon. Sus rekordo entra kon vos aki. Munchos i munchos muryeron komo vuestro padre i vuestra madre i los raros ke pudyeron sovrebivir sintyeron sufriensas ke no me syento kapavle de evokar.
Alhad el 21 del mizmo mez de Marso. La Prensa İnternasyonal mos ambeza ke despues largos mezes de lucha, Barack Obama salyo enfin Vensedor de una batalya ke ningun prezidente demokrato no pudo ganar en 100 anyos de politika interyor Amerikana “Dar a kaji la totalidad del puevlo amerikano, una verdadera seguridad sanitarya”
Alhad pasado, la Kamara des Reprezentantes aksepto kon 219 bozes kontra 212, el teksto adoptado por el Senato en data del 24 Desembre 2OO9, kon chikas modifikasyones.
La viktorya era ainda dubyoza poko antes ke kayga la desizyon final, uvo prealablemente un fuerte debate entre los dos partidos ke se enfrentaron kon violensa… el koste de esta reforma sera grande i la karga materyal bastante pezgada, ma finalmente 32 milyones de personas, ke no gozavan asta agora de ningun mamparo, tyenen oy en dia la sertitud ke en kavzo de grave problema de salud, ninguno kedara sin kudyo ni kura.
Las primeras palavras del Prezidente Amerikano despues de obtener la aprobasyon de la mayoria, fueron: “Pudimos prevar ke semos un puevlo kapavle de grandes kozas”.
En esta semana de Pesah ande fyestamos la liberasyon del puevlo djudyo del yugo del esklavaje, esta viktorya de Barack Obama mos ambeza ke ande ay ‘Ekidad’, ‘Voluntad’ i ‘Perseveransa’, ay tambyen Posibilidad de Reushita.
