Komo ya lo saven todo , kontraryamente al Djudaizmo ke konsidera la unyon lejitima entre una mujer i un ombre komo un akto kaji sakro, simbolo de vida i ke egzije de todos sus ofisyantes sinagogales de ser kazados, la Eglisya Kristyana, eya, impoza el selibato absoluto a todos sus prelatos i ofisyantes.
Ma malorozamente, desde unos kuantos anyos, numerozos kavzos de pedofilia al seno de la Eglisya son revelados al grande publiko kon una frekuensa de mas a mas grande. Elevos de eskolas relijyozas Kristyanas, komo chikos partisipantes de korales liturjikas fueron vyolados por sus maestros relijyozes.
Esto byen entendido prejudisya el sistema eklezyastiko Kristyano i tambyen mos prova una vez mas ke kaji ninguna persona puede ir kontra la reglas munchas vezes imperativas de la “natura”.
En repuesta a una pregunta ke le fue echa a este propozito, el Papa Benedictus XVI refuzo kategorikamente la idea de un kualkyer trokamyento en el aktual sistema episkopal.
