La semana ultima, fyestimos “PURİM” en todas las keilas, las organizasyones djudiyas kon grande entuzyasmo, i las kriyaturas kon grande egzaltasyon.
En la istorya de Purim; “AMAN” es la persona negra i maldicha ke supo travar la atansyon del imperador (imparator) Ahasverosh, ensima de los djudyos, para eliminarlos (yoketmek) del mundo.
El vizir (vezir) Aman, era una persona muy negra i le plaziya vazyar sangre. Kuando empeso a enteresarse de los djudyos se apersivyo ke; eyos kreen al Dyo Puederoso, una fuersa ke no se ve, i eyos tyenen unas tradisyones diferentes de todos. Son reushidos en todos los espasyos, i rikos. Estas todas partikolaridades de los djudyos no le plazyo a Aman, i se desido de despareserlos del mundo.
El buto suyo era de menospresyar al djudyo, para ke la fuersa ekonomika de el pase, al rey.
Antes sieklos del evenemento de Purim; si miramos a la Espanya, i aki vemos la mizma koza, komo ke los djudyos son viktimas del mizmo komporto de punto de vista konfiensa (inanç).
Akel tyempo en la Espanya, aviya una perioda de los Katolikos muy fervyentes (koyu).
Ma; el djudyo era diferente. El era muy fuerte, de punto de vista de kultura i sosyal. No aviya asimilasyon del todo. Ma malorosamente, el destino (kader) del djudyo era el mizmo. Los aviyan ovligados a trokar sus relijyones, i a los ke no akseptaron los kemaron. Esto sureyo un sieklo, i kuando no salyeron abash (başa çıkmak); en 1492 los egzilaron (sürgüne göndermek).
En 1930 en la Almanya, se enkontraron (karşılaşmak) kon el mizmo evenemento.
En la istorya, en Misrayim; el djudyo no rezistyo (direnmek), i a la fin lo izyeron lavorar komo esklavo. En Şuşan yene no rezistyo, grasyas a la reyna Ester; ke era alliada (dost) de los djudyos, se salvaron de murirsen.
En la Espanya de muevo no rezistyeron, i unos kuantos trokaron sus relijyones. İ a la fin en la Almanya; malgrado Hitler, no se imajinaron de lo ke puede afitar, i munchos se muryeron en el Holokosto.
İ aki, kijyeron tomar de la mano de los djudyos, la fuersa ekonomika i entelektual. İ en Purim; enkontramos (rastlamak) a las mizmas enkyetudes (kaygı).
La “Megila Ester” mos ambeza; ke las difikultades de la vida ke enkontramos, son un egzamen para ayegar, para arivar (ulaşmak) a lo mas mijor, ke los detenimyentos (engel) son okazyones (fırsat) para desveloparmos (kendimizi geliştirmek).
İ esto todo vyene de la mano del Dyo ke no vemos, i ke mos guia (rehberlik etmek) el destino (kader).
Las Mitsvas de Purim ampesan kon Taanit Ester, ke se aze el 13 del mes de Adar. Es el rekuerdo de la data, ke Aman aviya desidado de eliminar a todos los djudyos.
“Keriyat Megila” (Megilanın okunuşu), es la mitsva ke todos kale ke melden en el dia de Purim:
La “Megila Ester”.
Seudat Purim (Purim Ziyafeti).
El miraklo (mucize) de Purim se realizo, entre las envitasyones (davet) i pransos. Por esta kavza Purim es; una fyesta ke todos deven de dar una seuda.
“Mişloah Manot” (yemek gönderileri). Todos, en dia de Purim; kale ke agan regalo dos komidas kayentes i bevyenta, a lo menos a una persona.
“Matanot Laevyonim” (ihtiyaç sahiplerine hediyeler).
Komo Mişloah Manot; i esta mitsva kale ke se aga en dia de Purim. Distribuir (dağıtmak) moneda a los menesterozos, a lo menos a dos personas en este dia mirakuloso. Azer orozos a los menesterozos sin averguensarlos (utandırmak).
La konkluzyon es ke kale kreer a los miraklos.
Kuando kreemos a muestra fuersa i a lo ke puedemos azer, kuando tenemos konfiensa (inanç) a mozos mizmo, i kuando mos konosemos, muestra vida se inche de los miraklos.
La vida es yena de sekretos. No puedemos saver de ande va vinir muestra salvasyon.
Si la persona kere veramente de aryento del korason una koza; si tyene una konfiensa grande en esto; estamos vyendo ke esto, se esta realizando.
Kale ser pozitivos (olumlu), porke tener inyervos, enemistad (kin), aborresimyento (nefret), u amistad, kerensya, entuzyasmo (coşku) u kalmo; todo mos toka en primero a mozotros, i mos enfluensa en bueno u en malo.
Pardonar al den frente, es akseptar las personas asegun son. Deshar lo pasado, es avrir lugar en muestra vida, a la kerensya i a los miraklos.
“La vida es un miraklo, ma los miraklos son los ke estan guadrados aryento de muestros korasones”.
