La semana pasada, diferentes eventos se sigyeron i se persigyeron sin arrestarsen i komo es de uzo, varyos komentaryos fueron echos por grandes editoryalistos de kotidyanos komo tambyen por diferentes analistos de la televizyon...
Se remarka envezes “similitudes” komo tambyen “klivajes de opinyones” .. Uvo debates, refleksyones ineditas, raramente un konsensus total, ma syempre muevas persepsyones de una mizma situasyon....
Me vo esforsar de sitar algunos de estos komentaryos sovre diferentes sujetos, de una manera mas o menos fidel i chronolojika:
Me syento ovligada de empesar por la terrivle tempesta ke kavzo mas de 50 muertos en Fransya, payis jeneralmente reputado por la kualidad de su arkitektura ...esto mos konserna todos porke kon las perturbasyones atmosferikas kaji kaotikas, muy frekuentes estos ultimos anyos, todos semos ekpozados al mizmo peligro.
Es ke uvo una neglijensa humana? Es ke, en desparte de los simples avizos de alarma, se puedia prevenir el dezastre humano? Munchos ombres de sensya dizen ke se trata del enkontro de fenomenos atmosferikos independentes los unos de los otros: “kondisyones atmosferikas partikularmente dezastrozas” , “oras de “fluhos” (denizde kabarma)”,”el fakto ke esto se paso la noche a las oras ande las viktimas se topavan undidas en el eshuenyo”,ets...ets...
Eske no se puedia tomar la desizyon (antes mizmo kel perikolo se anunsye) de derrokar moradas ke no responden enteramente a las preskripsyones arkitekturales imperativas sovre un literal suseptible de devenir peligrozo, en tomando simplemente en konsiderasyon la posibilidad de una semejante reunyon de faktores negativos, mizmo si esto se produze una vez en dos o tres siglos?...difisil de rezolver un semejante problema.
De mezmo al prinsipyo de la semana pasada, evenementos atristantes se produzyeron en Yerushalayim sovre la esplanada de la Grande Meshkita Muzulmana, provokados por grupos de la manseves Palestinyana ke echaron pyedras a los turistos i relijyozos djudyos ke se topavan en estado de orasyon delantre el “Kotel Maaravi”... i tambyen, (de otra parte) la deklarasyon del primer ministro Israelyano de konsiderar syertos Lugares Santos de muestro pasado Bibliko situados sovre las tyerras Palestinyanas, komo patrimonyo relijyozo Israelyano , lo ke provoko la furor de los adversarsyos.
El konflikto riska de devenir no solo una simple konfrontasyon politika, ma lo ke es realmente muy grave, un empesijo de “choque relijyozo” a una epoka ande el fanatizmo devino desgrasyadamente el refujyo de munchas kreensas.
Un rayo de luz : delantre las olas de gzenofobia (yabancı sevmezlik) ke se presipitan aktualmente, en varyos payizes evropeos, kontra las minoridades islamikas: La LİCRA institusyon kreada para la lucha kontra “el antisemitizmo” i “el refuzo del estranjero” protesto fuertemente kontra los movimyentos i sinyales de odyo munchas vezes indjustos ke se manifestan kontra la populasyon islamika.
Djueves la noche komo kaji todos los sitizanos turkos, pude personalmente segir a la T.V. Turka la votasyon konsernando la propozisyon de un departamento del Ministaryo de los echos estranjeros Amerikano, konsernando la denominasyon “jenosidyo” para kualifikar los regretavles akontesimyentos del anyo 1915 entre el Imperyo otomano i sus sitizanos ermenis ...
Asta poko antes ke eskape, la votasyon paresia ser en favor de muestro payis ma desfortunadamente verso la fin el ayre parese aver trokado de direksyon i es la partida adversa ke triunfo de poko.
La mas parte de editoryalistos de los kotidyanos elektronikos Fransezes, komo tambyen la mayoria de los analistos ke partisiparon a los debates televizados formularon sus deskontentes por el rezultado final...
Komo lo pensamos syempre,” la denominasyon “jenosidyo” atribuida a eventos negativos en el korso de un konflikto armado, debasho la influensya de la ravya i de la ira” no responde a este titulo infamante ke sinyifika “eksterminasyon metodika i sistematika (aparejada kon sangre fria) de la totalidad de un puevlo en el solo objetivo de eliminarlo kompletamente del espasyo vital del mundo” ... lo ke no fue a ningun ningun momento la intensyon de la armada Otomana.
Alhad 7 Marso ,malgrado el perikolo de asaltos terroristos, una grande partida de la populasyon Irakyana tuvo el koraje de enfrentar la muerte afin de kumplir su dever i en mizmo tyempo derecho de sitizanos otonomos
İ enfin ,por serrar esta serie de akontesimyentos, Kathryn Bigelow fue la loreata del Oscar 2010 por su filmo “démineurs”.
Es la primera vez ke este prestijyozo premyo sinematografiko es atribuido a una realizadora sinematografika feminina, i esto “el 7 Marso la noche”, unas kuantas oras antes ke espunte el 8 Marso promulgado “dia de la Mujer”.
