La amistad se mantyene simplemente de komunikasyon
Montaigne
Alhad pasado tuve la grande kontentes de topar entre los mensajes impersonales ke kada uno de mozotros resive kaji kada dia, una misiva de amistad, una de estas ermozas kompozisyones kompuestas de poezia, simbolos i muzika, ke mi amiga Nuriye Franko me mando, djesto de kerensya komo una prezensya por seguro impalpavle ma kayente en su ekspresyon.
En la primera estrofa (ke vos transmeto mas abasho, transkrita en muestra ortografia sefardi uzual) el poeta dize tekstualmente:
“Interesante deskubrimiento
Un estudio publicado por la Universidad de los Angeles indika ke la amistad es verdaderamente espesyal.
Se deskubrio ke los amigos kontribuen al fortalesimyento de la identidad i proteksyon de muestra salud futura, (eyos) konstituen un remanso (espasyo de trankilidad) en medyo del mundo real,yeno de tempestadas i obstakulos.”
I una vez mas senti la valor inkonmensuravle del sentimyento de amistad, el avantaje de tener puntos de apoyo sentimentales en la atmosfera de instabilidad del mundo aktual ande todo parese ser fujitivo i inkonsistente.
En esta epoka de mundyalizasyon ande el individuo se syente munchas vezes solo, komo pedrido en un espasyo en perpetual movimyento, ande relasyones sosyales se atan i se dezatan afuera de muestra voluntad, a la favor de sirkunstansyas i faktores ke mos son ajenos, el sentimyento de amistad es komo un abrigo irremplasavle.
La sensasyon de soledad es ainda mas virulente en medyo de la masa anonima de personas relativamente ajenas ke vos miran sin vervos i vos oyen sin entendervos; la persona syente el menester imperyozo de komunikar, de sentir el reflo kayente de un interlokutor ke vos oye verdaderamente...
Alhad pasado, una vez mas, senti la importansa de azer parte de una kolektividad kompuesta de myembros por seguro de edades i mizmo de konsepsyones diferentes, ma syempre en estado de kudyo i de solisitud. Un largo momento me demandi; “De kualo nase la amistad entre dos personas, envezes mizmo totalmente diferentes la una de la otra?” No topi ninguna repuesta i realmente no kreo ke ninguno puedra responder kon presizyon a esta kestyon
Puede ser de un momento de enkontro afektivo muy profundo, en la refleksyon de una mizma valor... Puede ser tambyen de un momento de menester resiproko de prezensya humana kon la kuala partajar una mizma sensasyon o una mizma persepsyon de kualkyer evento ....
Los puntos de partensya son multiples ... en todo kavzo la amistad no nesesita syempre una similitud total de ideas... eya no egzije ningun renunsyamente a muestra propya individualidad, ma simplemente un esforso mutual de “komprensyon” i komo lo disho Montaigne de “komunikasyon”..