Transmisyon de poder en el komite del “İhtiyarlara Yardım Derneği”
A la sigida del kumplimyento del “mandato de Prezidente” de Hayim Küçük, este grande onor fue transferado a Janet Mayer, la kuala desde largos anyos lavora kon ardor i asiduidad en un posto de responsabilidad a la kavesa del Azilyo de los Vyejos, verdadero refujyo para los aedados i aislados de muestra komunidad. Todos muestros agradesimyentos a Hayim Küçük por su lavoro karitativo de grande valor al profito de muestra Kolektividad i muestras sinseras felisitasyones, buenos dezeos i augures a muestra kerida korelijyonarya Janet Mayer.
Komemorasyon del rekuerdo de un ombre de byen
La Memorya de Nesim Albala ombre djusto i piadozo, grande ovrero de la ermoza evolusyon del hospital Orahaim, fue onorada kon respekto i emosyon en la Kehila de Kuzkuncuk de la kuala el fue uno de los dirijentes i ke el kontinuo a frekuentar kon fidelidad, asta los ultimos dias de su vida. Ke su rekuerdo sea syempre eskrito kon letras luminozas en la memorya de muestra komunidad.
La muerte de uno de los ultimos myembros de la komunidad de Çanakkale
La Komunidad de Çanakkale pedrio uno de sus ultimos myembros Yaşar Yohay muy aktivo i syempre moralmente muy atado a la chika kolektividad a la kuala el apartenia. Ke su alma repoze en paz. Prezentamos muestras sinseras kondolensas a sus serkanos i amigos.
