El djusto dozaje

Klara PERAHYA Judeo-Espanyol
16 Aralık 2009 Çarşamba

Es ke la sinyifikasyon de algunas palavras troko? o byen (lo ke sera mas grave) eske troko “la eskala de valores” ke mos paresia ser la baza  de un mundo koerente i djusto?

Al pareser, kada prinsipyo moral ke mos paresia ser absolutamente bueno i seheludo se revelo, en syertas sirkunstansyas, yevar en su estruktura mizma elementos pozitivos komo negativos, ke solo el ombre (en su kualidad de kriansa pensante, riko de un relativo libre arbitre) tyene la posivilidad de nivelar segun el konteksto sosyo-psikolojiko del momento?

Unos kuantos anyos antes, en los payizes kapitalistos, munchos entre los grandes teorisyanos de la Ekonomia afirmavan kel “Libre Merkado- tenia sus propyas leyes i su propyo sistema oto- regulador”... Todo en mentenyendo kel sistema kapitalisto es uno de los mijores, devemos akseptar ke ninguno de entre eyos puede sovreguadrar su ekilibre sin la vijilansya del ombre.

Anyos antes, el nasimyento de un ninyo, en ke lugar del mundo ke fuera, era konsiderado komo un akontesimyento sakro, prezaje de esperansa i alegria. Oy en dia, en la konferensya de Kopenhag , munchos savyos (todo en manifestando sus absoluto respekto por kualkyer vida umana) dizen ke la “eksplozyon demografika de syertos payizes del Sud” riska de meter en peligro  el ekilibrio vital del universo.

Anyos antes, saviamos  ke kada payis era  otonomo en su manera de bivir ansi ke en su fey i sus kreensas, i ke ninguna otra potensya estranjera tenia el derecho de intervenir en su governansa interyor. Oy en dia, en kavzos ekstremos, la “non-intervensyon” es konsiderada komo falta de “no-asistensya a personas en estado de sekana”.

Djuevez  pasado el 10.12.09, en la seremonia mizma durante lakuala  el premyo Nobel le fue entregado, Barack Obama kon su koraje i su prinsipyo imperativo de frankeza, respondyo a la kestyon ke varios komentadores  formularon, konsernando el fakto de atribuir la mas grande distinksyon honorifika, simbolo de la  Paz, a una persona ke  tomo la desizyon  de mandar muevos konvoyes de soldados en la esfera de batalya Afgano-Pakistaneza.

El disho lo sigyente.

“Es ke se puede resivir el premyo de la paz todo en azyendo la gerra?....

Dezir ke se kere la paz no es bastante para obtenerla... Si la paz es el objetivo prinsipal,  la gerre es entonses justifikada. Un movimyento sin violensa no puediya arrestar Hitler en su karnaje , ni oy  puede persuadar Al-Kaida a deshar las armas.”

Todo depende del djusto dozaje de kada presepto, i esto, solo el Ombre lo puede realizar.