La semana ultima, tuve la okazyon de asistir a dos evenementos, en estas organizasyones djudias.
La primera era; un meldado, un korte de mez de la madre (ke este en gan-eden) de una amiga entima, djusto a las oras de midi, en el ospital OR-AHAYİM.
Ay 110 anyos ke este ospital; esta dando un servisyo perfekto a los hazinos, a los menesterozos i a los paryentes de los hazinos kon la tolerensya del mas chiko fonksyonaryo (memur), al mas grande.
Kuando entraj de la puerta, i tomaj kamino verso la guerta yena de rozas, todos vos ampesan a saludar kon karas riyentes, i a ayudarvos si tenej menester.
Sin dirijarvos al lugar ke kerej ayegar, eyos mizmo vos akompanyan, por fasilitar las formalitas.
Las volontaryas rozes “Pembe Melekler”; vos arisiven kon una grande kerensya.
Despues del meldado, suvimos al refektoryo (yemekhane) para komer. Komo de servisyo! Komo de entereso (ilgi) ! de las volontaryas i de los profesyonales... Todo estava mas ke savrozo, mas ke bueno. La solidaridad (dayanışma) i el devuamyento (fedakarlık) de los ke estan lavorando, la emportansa ke estan dando a las personas; esta mostrando sus misyones ke es; asegurar siempre, el provecho (yarar) menesterozo de la umanidad. (Herzaman insanlığa yarar sağlamak). Yo penso ke esto es sus prinsipyos (ilke), i les oguro siempre reushitades en todos los espasyos, porke este ospital Or-Ahayim; es una garansia (güvence) emportante por la komunitad djudia de Estambol.
Myerkoles ultimo fui envitada a una komida de midi, a BARINYURT. Esta komida se repeta kada anyo en envitando a las volontaryas ke lavoran de alma i de korason en todas las organizasyones (kurum) i las asosyasyones (dernek).
La presidente de las mujeres de Matan-Baseter Barınyurt; Eti Tastasa, mos aresivyo en la puerta kon su kara riyendo i dando una enerjiya positiva.
Manseva, ermoza, dulse i respektuoza mos dirijo a las mezas bien ornadas muy ordenadas (düzenli), fina al mas chiko detalyo. Era un plazer i un privilejyo (ayrıcalık), de asistir a esta envitasyon.
Siguramente no ay ke avlar por el komer, i la prezantasyon de las komidas. Perfekto, es un biervo insufizyente (yetersiz), por esta organizasyon ke tiene una misyon muy emportante en la komunitad.
Barınyurt ya se provo (kanıtlamak) de si para si en este sujeto, mizmo afuera del pais, azyendo las komidas “glad kosher” en los aviones.
Yo penso ke; kale dar un apoyo (destek) muy fuerte a esto, para ke puedan kontinuar sus misyones kon grande ardor i veluntad.
Shans buena i reushitad a todos los volontaryos i dirijentes de BARINYURT...
Despues del komer; el Profesor Moiz Bahar; dyo una konferensya ke el sujeto era; “Las relasyones de los doktores kon los hazinos, i la komunikasyon (iletişim) kon los serkanos de los hazinos”.
El doktor konosido i famozo kon su modestia i su saveduria; kon su boz dulse ke repoza al den frente, ke su egzistensia es una garansia para el hazino i los paryentes; avlo en este sujeto enteresante, komo azer una konversasyon normal, kon tantas mujeres oyendolo kon muncha atansyon.
El disho ke; “La komunikasyon es un empleo (alışveriş) entre las dos partes.
Los problemas de un hazino konsyente (bilinçli) i entelijente son minimum. El doktor es siempre kondensado (yoğun), no tyene tyempo. El hazino deve de demandar de apartarle tyempo para avlar i dar las desizyones menesterozas. El doktor deve de aklarar (aydınlatmak) i azer una reunyon kon los paryentes, para darles a entender todos los detalyos, kon una lingua neta (net) i djusta. La konfiensa i el respekto es lo mas emportante en esta relasyon.
Los prinsipyos de la komunikasyon son:
* Enformar al den frente kon fasilidad,
* Enformar al den frente de una manera kompleta,
* Enformarlo de una manera konsistyente (tutarlı),
* La satisfaksyon (memnuniyet) de los serkanos,
* Krear lo perfekto (mükemmeli yaratmak),
* Transferar (aktarmak) todo, a los paryentes del hazino.
El termino su avla en dizyendo:
“Muestra profesyon es muy difisil, ma malgrado esto, keremos kon grande amor muestra karyera”.
La reushitad de la persona es proporsyonada (orantılı), kon el kerer byen su profesyon.
Rogo ke; el doktor Moiz Bahar, este sano i rezyo para ke pueda ayudar a la umanitad, porke el es; una persona muy presyoza!...
