Asender una senteya “HANUKA”

Las luzes de la “MENORA” se asyenden kon el “Shamash”ke es sus giador i les da la primera senteya para ke arrelumbren.” 
Rav Naftali Haleva

Coya DELEVİ Judeo-Espanyol
9 Aralık 2009 Çarşamba

Kuando me asenti azer un teksto sovre Hanuka, kedi un largo momento indesiza. Kualo pudiya eskrivir, diferente de lo ke eskrivi mas antes, en kada anyo?.. Fue en pensando ansi ke me akodri de un teksto bastante instruktivo ke tengo meldado en la revista de D.Y.D (Dostluk Derneği) i sinyado Rav Naftali Haleva. Kero transferar aki syertos pasajes de este artikolo intitulado “Hanuka Mucizesi” (El Mirakolo de Hanuka). Despues de relatar el milagro del kantariko chiko de azete ke asendyo durante 8 diyas, mos dize: “Esta selebrasyon de 8 diyas dyo lugar a una vyeja anekdota Yiddish:-...Kualo!! Una selebrasyon tan grande para este pokitiko de azete??!...”
Antes de ir mas leshos, kero dar una chika ma importante informasyon. En 1943 los Kristiyanos de Danemarka fueron los protektores i salvadores de los djudios danezos. La “Senteya” del koraje, de desfio i rezistensya del puevlo kontra los Nazistos, fue asendida por el Rey Christian X. Aki estan, relatados por Rav Naftali, los byervos del Rey Danezo kuando protesto el orden alemano de ovligar todo djudio a apuntarse la Estreya de David:
“...La Komunidad Djudia es una partida del Puelo de Danemarka, es mi puevlo. No tenemos dingun problema kon los djudios, dinguna inimistad.. İ nunka tuvimos. Por modo de esto, si a los djudios los estan ovligando a apuntarsen esta estreya amariya, yo i mi famiya tambien, vamos a tener esta estreya sovre mozotros, komo un grande onor...”
Kero adjustar i yo, ke el Rey Christian X de Danemarka (1870-1947) fue el simbolo de la lucha del puevlo Danezo durante la invazyon alemana, en refuzando la deklarasyon nazista kondenando los djudios de este pais.
Me parese, antes dos, tres anyos en estos diyas aserkandose  Hanuka, nombri a Flory Jagoda, la Kerida Nona de la Muzika Sefarad. Kon la idioma del sefarad de Bosnia, eya kontinua la tradisyon a traverso su muzika. Komo en su kantika “ La Yave de Espania” en el “Record”-Memories of Sarajevo”, (esta sivdad era nombrada komo “Chika Yerushalayim”) Flory mos konta ke su nona, syempre avlo en “djudio” i diziya: “Si sos djudia kale avlar en Djudio”...
En la Amerika Flory es mombrada tala “A worm Jewish Voice” (una boz djudia “kayente”). Despues de la 2. Gerra Mundial, eya se fue a los Estados Unidos yevandose de Sarayevo i la Muzika suya i asigurando ansi, la kontinuasyon de esta “Erensya”. Los ke se enteresan de serka a esta Muzika, syenten kon grande plazer los diskos, kasetas, C.D’s de Flory desde anyos. Ma sintirla de serka, tyene otra savor, otra valor.. Tambien es una shans inolvidavle ke tuvimos en 2007... Sintirla aki en el konsierto ke dyo en Estambol myentres  los diyas de “Kultura Sefaradi”.
A un momento me olvidi ke esto azyendo un teksto de Hanuka. Esto avlando de aki de aya. Me rendi kuento mas despues, ke es a esta okazyon ke me akodri de Flory i de sus kantikas de Hanuka. En uno de sus C.D’s ay djustamente kantikas de Hanuka. La una ya la konosemos todos i a la okazyon la kantamos todos endjuntos: “Ocho Kandelikas”... Tambien ay otruna kantika en el C.D  i ize mi posivle para alkansar a tomar las palavras... o syertas!
Selebraremos Hanuka kon alegriya i kon las luzes de la Esperansa i estos versos de Flory: “Hanuka linda esta aki / Ocho kandelikas para mi...”
Hag Hanuka Sameah.