Las vertudes de la lektura son inmensas i multiples... En desparte de todo lo ke mos ambeza, eya mos pusha a pensar.... Kada refleksyon formulada en una eskrita aze naser en el esprito del lektor una refleksyon mueva i ansi avre una puerta sovre espasyos munchas vezes deskonosidos.
En el ultimo editoryal de Jean Daniel, ko-fundador del ebdomadaryo Fransez “Le Nouvel Observateur”, el eskrive lo sigyente al sujeto del prezidente aktual de los Estados Unidos:
(traduksyon aproksimativa)...
“El milagro Barack Obama no pudia prolungarse al infinito i kuando me akontesia de afirmarlo era para aleshar kualkyer negro prezaje. Ma estas ultimas semanas la realidad mos ovliga a admeter el fakto. Por seguro no es ainda la derrota ma el “dubyo”.
Su popularidad se amenguo mizmo en la esfera de los ke lo avian ayudado a ayegar al poder. Las razones son byen konosidas i ninguno se retyene de repetarlas: la penuria, el shomaje,el Afghanistan, el Iran, el problemo İsraelo-Palestinyano ets…ets...”
(fin de sitasyon)
Tyene razon Jean Daniel, el mizmo grande admirador del prezidente. Si...el entuzyazmo impulsivo de los primeros tyempos por seguro kayo… Barack Obama fue a un syerto momento komo un djenero de Esperansa no solo para su puevlo ma para munchos otros payizes tambyen.Esto dicho,kale admeter ke no es posivle ke la esperansa se realize immedyatamente eya demanda tyempo, madurasyon (olgunlaşma).
Despues de la euforia del empesijo, vyene kaji inevitavlemente un periodo de ezitasyon i fatalmente de desepsyon. De otra parte, tenemos malorozamente la manya de djuzgar kualkyer situasyon segun el porsentaje de reushita o de fayita immedyata ke eya prezenta i no (lo ke sera lo djusto) segun el kamino echo i la suma de esforsos investidos para arrankar varios problemas del estado de letarjia ande eyos se topavan enterrados asta oy.
Por seguro, komo lo eskrive Jean Daniel i ke lo pensan munchos otros komentadores, unos de los multiples motivos ke kavzan el aparente marazmo aktual de su mandato, son: la kriza ekonomika mundyal i los varios problemas politikos universales, independentes de su propya voluntad.
Se puede adjuntar tambyen un otro faktor ke a mi pareser es muy importante: “muestra despasensya”. Deke refuzar envezes de ver la situasyon en su totalidad real i en la potensyalidad ke eya yeva en si?
Eske parvenir a trokar poko a poko la mentalidad de un puevlo prioritaryamente enfokado en el dezeo de afirmar su superyoridad, no es el prinsipyo de una realizasyon pozitiva?
Es ke “atakar problemas aogados asta agora en la masa abrupta i informe de la inersia” no es el empesijo de una prestasyon de grande valor?
“El Kongreso i el Senato de los Estados Unidos votaron (kon una muy chika mayoria es verdad) el projeto de asegurar verdaderos kudyos medikales a milyones de sitizanos en estado de prekaridad” Es ke esto es una koza sin importansa?
Otros prezidentes antes de el tuvyeron el mizmo dezeo ma se detuvyeron de meterlo a egzekusyon por no komprometer sus propyo avenir. El, Barack Obama, tuvo el koraje de azerlo..İ es ansi de varios otros problemas.
Komo lo disheron i lo dizen ainda munchos grandes ombres de refleksyon “desharemos al “Tyempo”, el tyempo de azer su lavoro de madurasyon. No es syempre el rezultado immedyato ke es el verdadero.
