La semana pasada, Claude Levi Strauss serro por syempre sus ojos a la edad de mas de 100 anyos, en estado de perfekta lusididad, el esprito klaro, en posesyon de todas sus fakultades mentales i intelektuales.
El fue uno de los mas grandes etnologos de muestro tyempo. Grande universalisto, su lavoro no se limito a las solas sivilizasyones ke mos son mas o menos konosidas, ma espesyalmente a la kultura, manera de ser i de pensar de los tribos etnikos leshanos ke biven en la profondura de las grandes sharas de la Amazonia, ahuera de los konseptos i objetivos ke son prevalesyentes a muestra epoka….
El se enfoho sovre estos grupos de ombres i mujeres ke nunka se adaptaron a la evolusyon de muestros tyempos i ke mozotros yamamos “los primitivos”.
Enkontri en el kotodyano elektroniko “Le Monde” debasho la sinyatura de Michel P. el komentaryo sigyente del kual ize un chiko rezumen:
“...Levi Strauss mostro la diversidad i tambyen la kualidad de estas sivilizasyones, elaboradas a traves el tyempo, kada una respektavle i esmovyente.
Eyas son grupos etnikos multiples i kompleksos; mizmo los mas chikos i los mas modestos de entre eyos, trasados por el ambiante ande biven, son portadores de valores orijinales i koerentes.
El grande savyo mostro ke esta varyedad forma la grande rikeza de la sosyedad humana i tambyen un patrimonyo muy presyozo.”
(fin de sitasyon)
Se puede entender ke segun Levi Strauss, los mitos i los totemes de kada uno de estos grupos etnikos ke pasan sus vida ahuera de las reglas de muestra epoka aktual, son byen estrukturados i a sus torno estrukturaron de una manera koerente sus manera de ser.
Chikos o grandes, eyos tyenen sus kodigo moral i sosyal i tambyen sus propyos paradigmos.
Nasido el 28 Novembre del anyo 1908, al seno de una famiya djudia de artistos, Claude Levi Strauss tuvo desde su chika edad akseso a la konosensya de la muzika i de la pintura.
Inyeto de un gran Rabbino , el fue portanto enteramente irrelijyozo (dinsiz). Durante su vida el fue integralmente un humanisto i su mirada filozofika komo syentifika fue kontinualmente universalista, en el senso el mas estrikto del byervo..
Al pareser, el nunka renyego su orijen djudia, ma tambyen nunka kijo asumir en su pensamyento, la parte de judeita ke pudo aver en su enkaminamyento egzistensyal.
Aprehendado en su kualidad de djudyo, por las autoridades nazis, Claude Levi-Strauss reusho a fuir en el anyo 1941 a los Estados Unidos ande kreo kon unos kuantos otros amigos, la “Eskola libre de altos Estudyos de New York”.
La terror ke soplava a este epoka sovre la Evropa lo inchia de horor. El syempre blamo la destruksyon de kualkyer orden humano establesido i mizmo el no perdono a muestra sivilizasyon aktual de aver penado (espesyalmente durante la epoka kolonyalista) a reduzir a sus propyas valores las sivilizasyones ke eran diferentes de eya.