Estranyo suerte ke el del puevlo djudyo. Kontinualmente kritikado i akulpado, Perpetualmente insertano,Nunka seguro del dia vinyente Ma tambyen nunka dezesperado
Martes pasado la noche, munchos de muestros sivdadinos sigyeron kon interes la emisyon TEKE TEK del posto Haber Türk; en la okurensya, una entrevista muy nteresante entre el Konsul Jeneral de Israel Moshe Kamhi i el byen konosido djornalisto Fatih Altaylı...
El debate tenia komo “tela de fondo” las varias akuzasyones o reproshes ke se abatyeron sovre Israel a la segida de la guerra de Gaza kontra el Hamas i el raporto del djuzgo Goldstone.
Entre los temas abordados (en desparte de la ratifikasyon del raporto Goldstone de parte de la ONU, grande Institusyon Universal influensada al pareser por los intereses pro- arabos) se trato tambyen del chiko malentendimyento diplomatiko ke se produzyo entre la Turkia i Israel, konsernando las observasyones bastante severas ke fueron formuladas al sujeto de la dimensyon de las operasyones militaryas Israelyanas i se avlo en mizmo tyempo de la projeksyon (en un posto de la Televizyon Nasyonal Turka) de un filmo vizivlemente difamatoryo enverso los gerreyadores Israelyanos.
El debate se produzyo en una atmosfera relativamente amigavle, sin a ningun momento klualkyer dezeo de polemika. Las kestyones de Fatih Altaylı esatavan pertinentes i byen estrukturadas sin malveyansa ni ekivoka.
Las repuestas de Moshe Kamhi fueron frankas i klaras en sus formulasyon, sin kaji ningun rodeo ni terjiversasyon , syempre bazadas sovre la otentisidad i en un konstante esforso de disipar kualkyer malentendimyento, kon referensyas a la realidad.
En un “Turko” perfekto ke afirma su serkor afektiva i su kerensya por su payis de nasimyento, el konsul Israelyano avlo del estado de perpetual anksyedad en el kual biven las madre i los padres Israelyanos obsedados por los imprevizivles atakos terroristos del Hamas, el kual tyene desde largo tyempo objetivos prinsipalmente siviles; i a este propozito, el mensyono los asaltos mortales, ay de esto unos kuantos anyos, kontra otobuses yenos de ombres , mujeres i ninyos ke ivan ken a su lavoro ken a la eskola...
Moshe Kamhi insistyo prinsipalmente sovre el sentimyento de insekuridad i de amarga prekaridad del puevlo Israelyano entornado de odyo, renyegamyento i amenazas de anihilamyento total....
Se degajava de su avla el dezeo de aklarar la situasyon en toda su realidad i sovre todo de afirmar kon fuersa la amistad ke ata Israel i la Turkia.