El raporto Goldstone ratifyado por la ONU
La aprobasyon de la parte de la ONU del raporto Goldstone konsernando el konflikto del anyo pasado entre Israel i el Hamas en Gaza, no sorprendyo ningunos, visto ke la grande mayoridad de partisipantes son arabos i pro- arabos en esta grande Institusyon
El Kotidyano Elektroniko Fransez “Le Figaro”del 15 koryente, mos dize ke a la kestyon de una djornalista konsernando la enkuesta Goldstone, Shimon Perez respondyo ansi:
“La Juridiksyon de gerra es bazada sovre los konfliktos konvensyonales, nada es dicho konsernando el terrorizmo. El terrorizmo es un desfio a la Ley. Si las Nasyones Unidas konsideravan seryozamente esta kestyon, eyas devian aparejar un kodigo espesyal por este djenero de gerra i no enfoharsen (fokalizarsen) sovre Israel...
Entre las 26 rekomendasyones de la komisyon de enkuesta del djuzgo Richard Goldstone, ninguna dize komo luchar kontra el terrorizmo”
Bodas, kantes i kontentes en la Sinagoga Neveşalom
Alhad 18 Oktobre, despues largas oras de nuves oskuras i luvya, el Sol i la Luz.
Es en una atmosfera de grande emosyon, de kantes i alegria, ke fueron selebradas las unyones para una larga vida de amor i kerensya mutual, de: Felis Mizrahi kon Doğan HananelMirel Halyo kon Alper HulluMazalto Sağman kon Selim Benvenisti
El Dyo ke bendiga estas muevas kazas i ke syempre bivan la mizma alegria i miren ,dos a dos, en la mizma direksyon.
Muestros buenos auguros i felisitasyones a las famiyas “Mizrahi-Hananel”, “Halyo – Hullu”, “Sağman-Benvenisti”